813 Бардыгы /

ЖАЛАЛ-АБАД. Кыргызстандын Түштүгүндөгү Жалал-Абад шаарында улгайган адамдар спорттун түрлөрү боюнча күч сынашты.

Жалал-Абад шаардык мэриясы 1-октябрь – Эл аралык карылар күнүнө карата 15-сентябрдан 15-октябрга чейин “Улгайган курактагы адамдарга көңүл буруу жана камкордук” аталышындагы бир айлык жарыялаган. Дал ушул иш-чаранын алкагында калаадагы “Курманбек” атындагы стадиондо карыялар арасында спорттук иш-чара өткөрүлдү. Буга Жалал-Абад шаарынын вице-мэри Гүлбарчын Таштанбекова, калаанын эмгек жана социалдык өнүктүрүү башкармалыгын башчысынын орун басары Назира Жакыпова, Улуттук Кызыл Ай Коомунун өкүлү Гүлжамал Жолдошова жана жашы улгайган башка кызыкдар инсандар дагы катышышты.

Кары-картаңдар адегенде үч топко бөлүнүшүп, спорттун бир нече түрү боюнча күч сынашып, мелдешишти. Жеңүүчүлөргө белек-бечкектер дагы тапшырылды. Мындан тышкары буларга атайын сый-тамак дагы уюштурулду. Ошондой эле карылардын ден соолугуна кам көрүү максатында атайын медициналык текшерүүдөн дагы өткөрүлдү. Айтмакчы, Жалал-Абад шаарында 80 жаштан жогору курактагы 700дөн ашуун адам бар.

Алишер ТОКСОНБАЕВ, өз кабарчы