2,769 Бардыгы /

Атабыз жөнүндө канча ирет алкыш сөздөрүбүздү айтсак да, баарынан кымбат эне болот турбайбы… Ал киши тууралуу да эки ооз сөз айта кетейин…

Апабыз Жумабай кызы Зияда жөнөкөй эле үй кызматындагы аял болчу. Бирок ошого карабастан көбүнчө үйдөгү тарбияны биз апабыздан алдык, ал: улууларды сыйлоо, жакшы окуу, тазалыкты сактоо, кишиге кылган мамиле, меймандостук. Биз үчүн апабыздын сөзү боюнча атабыз закон дагы, конституция дагы эле.

Ошону менен бирге апабыз сулуулардын сулуусу болгон. Ар бир ападай эле баарыбызды өзгөчө жакшы көрчү. Жети баланы төрөп, чоңойтуп тарбиялоодо апабыздын салымы чексиз.

1952-1953-жылдары бир аз оорукчан болуп калып, атабыз аны айыктыруу максатында Москвага чейин алып барып келди. Дарыгерлер мындан ары төрөшүнө болбойт деп уруксат бербей коюшкан. Ал убакта Гүлсара карындашым экөөбүз гана бар элек. Бирок  дарыгердин тыюу салганына карабай андан кийин да 5 уул-кыз төрөгөн. 1971-жылы 48 жашында дүйнөдөн өттү.

Биздин арманыбыз – апамдын биз үйлөнбөй, кыздары турмушка чыга электе небере жытын жыттабай кеткенинде болду. Эң улуу уулу мен да апам кайтыш болгондон кийин үйлөндүм. Үйдөгү тарбиянын баары апамдын энчисинде болду. Ички тарбиянын баарын биз апамдан алдык.

Мен сөз башында тизмелеп кеткен, Субанкул Мавлянов атабыздан жана Жумабай кызы Зияда апабыздан тарбия таалим алып чоңойгон 7 уул-кыздарбыз.

Алар: карындаштарым Гүлсара –кесиби боюнча «технолог-инженер» көп жылдар бою кесиби боюнча чоң кызматтарда иштеди. Токтогул өрөөнүнүн кулуну менен турмуш курган. Күйөөсү Токтоналиев Автандил Токтогул өрөөнүнүн атактуу үй-бүлөнүн баласы. Балдары: Айнура, Жыргалбек, Сталбек, Теңдик баары үйлөнүп, жайланып турмушта өз орундарын табышкан.

Бүбүсара кесиби – экономист-финасист. Күйөөсү  Күйөөсү – Темирбаев Курманбек. Балдары – Арстанбек, Дамира, Дастан.

Гүлбара дагы жогорку билимдүү юрист болгон. Тилекке каршы оорунун азабынан азыр карындашыбыз арабызда жок.  Балдары: Мурат, Азамат. Турмушта өз орундарын таап, кызмат кылып жүрүшөт.

Эльмира- жогорку билимдүү. Эл аралык мекемеде иштейт. Күйөө балабыз Руслан Кенжегулов. Кайнатасы Кенжекулов Самидин Ош УВДда обл ГАИ болуп иштеген. Үч балалуу болушту: Эрмек, Тилек, Демирел.

Инилерим – Абдыкапар. Милиция кызматынын бардык тепкичтерин басып өттү. Милициянын генерал-майору, юридика илиминин кандидаты деген даражага жетишти. Аялы – Гуля Исакова. Кайнатасы Исаков Сагындык Ош УВДнын кызматкери болгон. Балдары: Тимур, Аида, Эмирбек, Айгерим.

Амангелди эркек балдардын кенжеси. Жогорку билимдүү. Атабыздын очогун өчүрбөй, биздин үй-бүлөнүн уясын сактап келет. Келинчеги Роза. Кайнатасы Биймырзаев Расул, кайненеси Айымкан, эл ичинде иштеген инсандар. Балдары: Айгүл, Багдайым, Жаңыл, Бексултан.

Аягында өзүмдүн да балдарымды атап кетейин. Зайыбым – Рая экөөбүз үч баланын ата-энесибиз. Улуусу – Динара, жогорку билимдүү, чоң окуу жайды жетектеп жатат. Күйөсү – Мурат. Уулум – Данияр өкмөттүк кызматта иштеп жатат. Аялы – Малика. Кенже кызым – Зыяда. Күйө бала – Айбек. Кудаларым: БорбиевТөлөн, Сарымсаков Руслан, Кыргызбаев Адылбек. Атам Субанкулдай эле мен дагы кудаларымды аябай бийик тутам жана сыйлайм.

Абдырахман Мавлянов