4,294 Бардыгы /

Азыркы мезгилде балдарга патриоттук тарбия берүү өтө маанилүү.
Себеби кыргыз элибиз да башка элдер сыяктуу чет мамлекеттерге чыгып, ал жакта көп жылдар калып кетүүдө. Айылдагы ар бир үйдүн бир же эки адамы четте жүрөт. Баарыбызга белгилүү саныбыз аз элбиз. Ошондуктан четке кеткен ар бир кыргыз бир мезгилде өлкөбүзгө кайтып келүүсүн каалайбыз. Эсиңердеби, булбул жөнүндөгү жомок? Алтын капастан, алтын идиштен, түрдүү тамактан эркиндикти, кичинекей мекенин жогору коёт. Биздин эл да башка өлкөдө. Канчалык жакшы жашаса да элим, жерим деп кайтуу үчүн ички дүйнөсүндө мекенчилдик сезими күчтүү болуусу керек.
Балалык мезгилдеги ар бир окуя эске түшсө жүрөктү балкытып жиберет. Ал гана турсун көргөн мультфильм, кинолор да ошол учурду эске салат. Ошондуктан бала чакта мекенчилдик тарбиясын берип калууга аракет кылалы.Мен да 25 жылдык тажрыйбама таянып, өз оюм менен бөлүшүп кетсем.
1-сыналгыдан бир убакта бешик тербеткен эненин алдей ыры ар дайым угузулса. Ыр назик үндө, уккулуктуу болсо.
2-ар бир тарбиясы бар мультфильм, кино ж.б. көрсөтүүлөр кыргыз тилине уккулуктуу которулса.
3- кыргыз жомоктору, апендилер кыскача театрлаштырылып берилсе. Эгерде каражат жок болсо келечектеги актер болуучу студенттер үчүн практика болмок.
4-сүрөт, кол эмгек, адеп сабактарында кез-кезде комуз күүлөрү коюлуп турса. Мына ушуларды угуп, көрүп өскөн ар бир кыргыз кайсыл жерде жүрбөсүн өз мекенин, өз тилин, өз элин сагынып куса болот. Ал эми сагыныч кайсыл учурда болбосун мекенине жетелеп келет.

Назира МАТКЕРИМОВА, Ала-Бука району, Т.Жоробаев атындагы орто мектебинин башталгыч класстар мугалими