5,249 Бардыгы /

Нефтичилердин кесиптик майрамына жергиликтүү жетекчилер катышпаса да, элдин агымы стадионго батпай калды.

9-сентябрь күнү Кочкор-Ата шаарындагы борбордук стадиондо “Кыргызнефтегаз” ААК нефтичилердин кесиптик майрамын белгилешти. Салтанатка аталган ишкананын Рашит Бостонов баштаган жетекчилиги жана жамааты,  Кочкор-Ата шаарынын вице мэри Жайнак Немат уулу, Ноокен районунун акими Эркинбек Маматаевдер катышты. Спорттук иш чара менен башталып, концерттик программа менен уланды. Ал эми майрамга келген элдердин саны көптүгүнөн стадион толуп, концерттик бөлүк башталар алдынан эле тартип көзөмөлдөөчүлөрү кеч келген көрүүчүлөрдү киргизбөөгө аргасыз болушту.

Алтынай Кадырова Кочкор-Ата шаарынын тургуну нефтичилер майрамына биринчи ирет катышып жаткандыгын айтат:

“Мен бул шаарга келгениме аз эле болду. Эгемендүүлүктө да мынчалык көп элди көрбөдүм эле. Таң калып турам. Шаардыктардын сүйүктүү майрамы ушул окшойт. “Кыргызнефтегазда” иштеген көп тааныштарым бар. Куттуктап коюп кетейин десем, жолдор элге толуп стадиондон чыгып кетиш да кыйындай го”.

Кошумчалай кетсек, майрамды белгилүү кыргыз эстрада жылдыздарынын шоусу коштоду. Концертте да төкмө акын Аалы Туткучов “Нефтичилер майрамына келген элдер көп, бирок эл башчылары жок. Губернатор, мэрлер келип куттуктап койсо болмок экен” – деп баштаганы сүрөөнгө ээ болду.

Роза АКМАТЖАН кызы, “Аймак”