3,801 Бардыгы /

Аксы районунун Кош-Дөбө айыл аймагынын Жаңгак айылындагы эскирип, кароосуз калган сарайды жаштар оңдоп түзөөдөн өткөрүп, спорттук машыгуучу жайга айландырышууда. Бул тууралуу маалыматты жергиликтүү тургундар билдиришти.
Алардын айтымында бул зал толугу менен бүтүп, ишке берилсе айылдагы тартип бузуучулуктар бир топко кыскарып, элдин көбү ден-соолуктарын чыңдамак дешет.
-Бир убактарда бул сарайдын кирпичтерин бөлүп кетебиз деген аксакалдар да чыккан. Бирок ага көпүлүк жаштар каршы чыгып, алып калышкан. Эми мындай демилге менен ишти баштап алдык. Жергиликтүү тургундар 100 сомдон 300 сомго чейин жардамдарын берип жатышат. Жакында эле Кош-Дөбө айыл өкмөтү тарабынан 20 миң сом акча каражаты бөлүнгөн. Айылдыктар ар кандай кол күчү, акчалай жардам менен кыш чилдесине карабай иштеп жатабыз. Түбүн цемонттодук.
Эми ал залдын айланасын тосуп, дагы жетишпеген шаймандарды алуу керек. ага болсо акча каражаты тартыш болуп, жетпей жатат. буга чейин Аксы райондук администрациясына кат жолдогонбуз бирок жооп келе элек,-дейт жергиликтүү тургундар.
Кошумчалай кетсек, аталган сарай 1980 жылдар аралыгында тамеки иштеткенге ылайыкташтырып курулган. Учурда кароосуз калып, элдин балансына өткөн.

Санрабия САТЫБАЛДИЕВА, “Аймак”