3,708 Бардыгы /

Быйылкы жылы Ош медициналык коллежине тапшыргандардын катары бара-бара калыңдады. Мунун чыныгы чоо-жайын аталган коллеждин быйылкы кабыл алуу комиссиясынын жооптуу катчысы Атыргүл МАМЫТОВАдан аста-секин сураштырдык.

– Атыргүл айым, быйыл талапкерлерди негизинен кайсыл кесиптерге катуу иргеп жатасыздар?

– Ош медициналык коллежине быйыл дагы жылдагыдай эле орундар ыйгарылды. Бюджеттик тайпаларга, маселен, дарылоо иши адистигине – 50, акушерликке – 50, медайымдыкка 75, лабораториялык аныктоого 25 орун бөлүндү. Ал эми контракттык негизде дарылоо иши адистигине – 25, акушерликке – 25, медайымдыкка – 75, фармацевтикага – 60 орун ажыратылды.

– Адистердин саны Ош жергеси үчүн дегеле аз эмеспи?

– Жо-жок! Жетиштүү эле. Заман талабын толук кандуу канааттандырат.

– Карасаңыз? Окуу жайыңыздардын залдары таптакыр бопбош го. Талапкерлер анан кантип сынак тапшырып жатышат?

– Ооба. Туптураа баамдапсыздар. Быйыл жылдагыдай тест жок! Өлкөбүздүн Түштүк жергесиндеги эң төмөн контракт акысы – биздин Ош медициналык коллежибизде. Адистигине жараша контракттын акысы 24 миң 200 сомдон 29 миң сомго дейре барып такалат.

– Атыргүл айым, дегиңкиси, канетсе да, Сиздерде билим сапаты кантти экен, ыя? Анан дагы окууну бүтүргөндөн кийин адистер бөлүнгөн мекемелерине барып сөзсүз иштешеби?

– Контракт төлөп окушкан бүтүрүүчүлөрүбүз  кайда барып эмгектенишет? Албетте, муну өздөрү гана чечишет. Биз буга кымындай дагы кийлигишкенге акыбыз жок!

Ал эми Ош медициналык коллежинин бюджеттик тайпаларын бүтүрүшкөндөр мамлекеттик ооруканаларда, ошондой эле медициналык мекемелерде эки жыл бою милдеттүү түрдө эмгектенишет. Бул тартип бизде абдан катуу кармалат жана дагы үзгүлтүксүз көзөмөлдөнөт.

МААЛЫМАТ ИРЕТИНДЕ

Ош медициналык коллежи Кыргыз Республикасынын саламаттыкты сактоо министрлигине карайт. Адегенде 1989-жылы Жалал-Абад медучилищесинин Оштогу филиалы сыңарында уюшулган. 1992-жылы ага толук кандуу жана өз алдынча макам ыйгарылып, Ош медициналык коллежи болуп кайрадан уюшулган. Ошондон тартып республикабыздын Түштүк жергеси үчүн орто билимдүү медициналык кадрларды үзгүлтүксүз белендеп келатат.

Кепке тарткан: Алишер ТОКСОНБАЕВ, өз кабарчы