123 Бардыгы /

Ош облусуна караштуу баардык шаарлардын мэрлери дээрлик жаңыланды. Мындан Ноокат шаары дагы кур калган жок! Жаңыдан дайындалган калаа башчысы Бекболот ЭГЕНАЛИ уулун кабарчыбыз капы-тапыл кепке тартты.

• Бекболот мырза, Сиз кайдан жүрүп капысынан Ноокат

шаарынын мэрлигине дайындалып калдыңыз?

• Сиздер күмөн санагандай, мен Асмандан түшкөн жерим жок!

Ноокат районундагы Кеңеш айыл өкмөтүндө иштечүмүн. Муниципалдык кадрлардын резервинде дагы болчуумун. Андыктан, бул кызматка эч кандай сынак-пынагы жок эле район акими тарабынан дайындалдым.

• Жаңы жетекчилер адатта адегенде эле камандасын

чекесинен жаңылап ийишчү. А Сиз антпедиңизби?

• Мен дээринен команда-поманда дегенге таптакыр каршымын!

Ноокат шаарынын мэриясында эски гвардия, мындайча айтканда, мурунку эле жамаат менен эле ийиндеше иштешешмин. Эгерде кимде ким кызматтык жоопкерчилигин унутуп, эмгек тартибин одоно бузса, албетте, ал – менин командам эмес!

• Бюджетиңиздер чакан эмеспи?
• Туптуура баамдапсыз. Чындыгында, ошондой. Бир жылдык

бюджетибиз болгону 91 миллион сом. Мен муну мындан ары көтөрүүнүн жол-жоболорун катуу издештирип жатамын. Маселен, Эл аралык Араб фондуна эки чоң  долбоор жаздык. Буга улай ички мүмкүнчүлүктөрүбүздү дагы ого бетер кеңейтмекчибиз. Бардык тармакты бүтүндөй ревизиялаймын. Салыктын түрлөрүн көбөйтүп, анан дагы республикалык бюджеттен чоңураак каражат сурамакчымын.

• Бекболот мырза, Ноокат шаары Сизге болочокто чоң

аэродром болуп, мындан дагы бийиктикке – чоң кызматтарга секирик жасайын деген ниетиңиз бардыр?

• Алишер мырза,  үмүтсүз – шайтан! Бирок, баардыгы тең

Алладан. Аллах дагы канчалык мээнет кылган пендесин сүйөт эмеспи. Демек, эли-журтума ак кызмат өтөсөм, акыры анын акыбети дагы кайтаарына мен бөркүмдөй ишенем!

МААЛЫМАТ ИРЕТИНДЕ

         Ноокат шаарынын жаңы мэри Бекболот ЭГЕНАЛИ уулу 49 жашта. Ноокат районунун Кеңеш кыштагында туулган. Ош мамлекеттик юридикалык институтун бүтүргөн. Кесиби – юрист. 7 уул, бир кыздын атасы. Келинчеги Асель Кадиева – жеке ишкер.

        Кепке тарткан: Алишер ТОКСОНБАЕВ, өз кабарчы