21,485 Бардыгы /

Акыркы кездерде оорунун түрү чыгып ага шыпаа издегендердин саны көбөйүүдө. Кандай гана оорулуу болбосун жанын аман сактап калыш үчүн ар кайсы методдо дарыланып көрөт. Ал эми алардын оорусун аныктап, дарылоо дарыгелерге жүктөлгөн. Бирок кээ бир оорулууну айыктырууда медицинанын алы жетпей калуусу толук ыктымал. Ал учурда өзгөчө методду колдонуп дарылаган дарыгерлер да бар. Мисалга алсак, Жалал-Абад шаарындагы врач-невропотолог, мануалдык терапевт жана иглотерапевт Жамшидбек Абдылдаев. Ал адамга кайрылган оорулуулардын дээрлик баары жакшы шыпаа тапканын айтышты. Ошол себептен ал киши менен кандай ыкманы колдонуп, дарыгерлерден эмне өзгөчөлүгү бар экени тууралуу маек курууну туура көрдүк.

Жамшидбек агай, айтсаңыз сизге кандай оору менен ооруган бейтаптар көп кайрылышат?

-Мага көбүнчө нерв оорулуулар жана травмадан кийинки баш оорусу, эс учун жоготуу(талма) менен ооругандар көп кайрылат.

-Негизинен сиз кайсы ооруларды дарылайсыз?

-Мен жалпысынан баардык оорунун түрлөрү дарылайм. Алардын ичинен өзгөчө Омуртканын кыйшаюсу, муун, баш, кан басымдын көтөрүлүшүн (1-2 стадияларын), уйку келбегендик, тез-тез жинденгендер, омуртка ооруларын (острехондроз, грыжа диска), энурез, инсультка кабылгандан басалбагандыкты, баш оору, эс учун жоготуу жана неврит ооруларын дарылап, кудайга шүгүр баарына жардамым тийип жатат. Азырынча жакшы болбой калдым,дарылооңуздун жардамы тийген жок деген эч ким жок. Баарысы айыгып, күнүмдүк жашоолорун улантып жатат.

-Жогоруда сиз айткан ооруларды медицинадан башка, өзгөчө кандай ыкма менен дарылайсыз?

-Менин дарылоомдун эң эле өзгөчөлүгү алтын ийне менен дарылайм. Омуртка сезгенгенде аны тартып түздөйм жана мануалдык терапия менен дарылайя. Анан дагы бир өзгөчөлүгү өзүмдүн методум боюнча уколдорду берем. Андай уколдорду биздин медицина иштетпейт. А мен аны көбүнчө Москва шаарынан алдырам.

-Медицинадан айырмаланып бул ыкма менен дарылооңуздун сыры эмнеде жана канча жылдан бери бул ыкманы пайдаланы эмгектенип жатасыз?

-Мунун негизи сыры деле жок. Өзгөчөлүгү алтын ийне менен оорунун түрүнө жараша дарылай берем. Анан дагы бул жердеги врачтар колдонбогон дары-дармектерди колдоном. Ал эми бул ыкма менен 30 жылдан бери оорулууларды айыктыруунун аракетинде эмгектенип жатам.
Сизге көбүнчө кайсыл жерлерден оорулуулар көп кайрылат? Күнүнө канча адамды кабыл алып дарылайсыз?
-Бул жерге негизинен бүтүндөй түштүк регионунан келген оорулуулар кайрылышат. Бирок, мага кайрылгандардын көбү бүтүндөй кыргызстанды кыдырып, дарыланып жакшы болбой жаткандар. Ошентсе да Кудайга шүгүр, өздөрүнүн шыпаасын таап, айыгып жатышат. Күнүнө 20 чакты адамды дарылайм.

-Дарылоо акысы кымбат эмеспи?

-Дарылоо акысы оорунун түрүнө жараша болот. Канчалык оор болсо ошого жараша болот. Адамды жакшы кылууга кандай аракет жасасаң акчасы да ошондой.

-Маегиңиз үчүн рахмат агай!

Ал эми биз болсо кийинки маегибизди Ж.Абдылдаев дарылап, бутка тургузган, Баткен шаарынан келип дарыланып жаткан Анзирет Каламбекова менен уладык.

-Анзирет эже, айтсаңыз, бул жерге кантип келип калдыңыз?

-Мен бул убакка чейин 7 жыл аралыгында Москва шаарында жана Кыргызстандын бүт район, шаарларында дарыланып келдим. Бирок эч кандай натыйжа чыкпай, дарыгерлер диагноз коё алышпаган эле. Анан Жакиш акенин (Ж.Абдылдаев) адресин угуп калып үзүлбөгөн үмүт менен келип калдым.

-Бул жерге келгенде абалыңыз кандай эле? Азыр кандай өзгөрүү болду?

-Мен бул жерге тырышып калып, таптакыр баспай келгем. 5 жыл баспай төшөктө жаттым. Бул жерге келип биринчи 10 күндүк дарылоодон кийин эле балдак менен басып калдым. Ошентип дарыланып отуруп кудайга шүгүр, азыр абалым өтө жакшы, өзүм басам. Өзгөрүү өтө чоң болду десем жаңылышпайм!
Мени ушул даражада айыктырып, ден соолугумду чыңдап, бутума тургузган Жакиш акеге ыраазычылыгымды билдирем.

Маегиңиз үчүн рахмат! Эч качан оорубаңыз!

Санрабия САТЫБАЛДИЕВА, “Аймак”