Рапия ТУРГАНБАЕВА: “БИРДИКТҮҮ ТҮЙҮНГӨ КОШУЛДУК”

4,528 Бардыгы /

Кыргызстанда интернет аркылуу Бирдиктүү түйүн – мейкиндик түзүлдү. Ошонун негизинде электрондук визаларды берүү дагы заман талабына ылайык ыкчам чечилип, туруктуу жолго коюлду. Эми бара-бара электрондук паспортко өтүү аракеттери дагы жасалууда. Ушул жана башка саамалыктар туурасында Кара-Суу райондук калкты паспорттоштуруу жана каттоо бөлүмүнүн башчысы Рапия ТУРГАНБАЕВА кабарчыбыз менен маегинде айтып берди.

Рапия айым, соңку мезгилде улан-кыздарга он алты жашынан паспорт берүүгө бекем ыктапсыздар го. Эмнеге?
Мыйзамга ылайык Кыргызстанды байырлашкан улан-кыздарга он алты жашка толгондо эле паспорт берилүүгө тийиш! Тилекке каршы, муну көпчүлүк биле бербейт. Качан он сегизге толгондо гана бизге кайрылышат. Кара-Суу райондук калкты паспорттоштуруу жана каттоо бөлүмүнүн алдындагы жаңжалды жайгаруу комиссиясы айласыздан маселени чукул карап, анан оң жагына чечүүгө өзү дагы ар тараптуу көмөктөшөт.
Мурункудай көп деле документ талап кылбай, эң негизгиси жарандарды убарагерчиликке салбайт турбайсыздарбы?
Ооба. Эрезеге жеткен ар бир жарандын Маалыматтык Базасы бүт мамлекеттик органдарда сары майдай сакталуу. Анткени, Кыргызстан боюнча бирдиктүү түйүн – Маалыматтык База эбак түптөлгөн. Жарандардын жашы жеткенде, же ID кардын, же жалпы жарандык паспортун кокусунан жоготуп ийишсе, өлкөбүздүн каалаган булуң-бурчундагы паспорттоштуруу жана каттоо бөлүмүнө кайрылышып, маселесин ыкчам чечтиргенге ыңгайлуу шарт түзүлдү.
ID карддын, же жалпы жарандык паспорттун наркы заманга жараша кымбаттаган жокпу?
Жо-жок! ID карддын баасы – 290 сом. Ал эми жалпы жарандык паспорт 530 сом турат.
Ошентсе деле бул өңүттө жарандарыбызды түшүнбөстүктөр тооруп тургандыгын кантип танабыз?
Кара-Суу – Кыргызстандагы эң чоң жана чачыранды район. Ошол себептүү райондук калкты паспорттоштуруу жана каттоо бөлүмүнүн кызматкерлери маал-маалы менен айыл-кыштактарды кыдырышып, эл арасында агартуу жана түшүндүрүү жараяндарын ыраса күчөттүк. Менин баамымда, Кара-Суу районунун калкынын 55 пайыздан ашыгы паспорт алуу түйшүгү абдан эле жеңилдегендигин дээрлик түшүнүп эле калышты. Ошондуктан, алар убарагерчиликтен дагы опоңой кутулушту. Бул салтыбызды, буюрса, эч токтотпостон мындан ары дагы ырааттуу түрдө улантабыз.
Рапия айым, мына электрондук визалар бериле баштады. Ал эми электрондук паспорт системасына качан кошулабыз?
Ооба. Былтыртан бери электрондук системаны Кыргызстанда жөнгө салганга жарадык. Ошентип, буга заманбап жана жетишээрлик шарттар дагы түзүлдү. А бара-бара биз деле электрондук паспортторду колдонууга ыктайбыз. Башка аргабыз жок. Анткени, бул – мезгилдин эч кечиктирилгис талабы!