1,668 Бардыгы /

Түркмөнстандын Балкан облусундагы Түркмөнбашы шаарында айдоочу аялдарга карата көзөмөл күчөтүлдү. Жол полициясынын кызматкерлери автоунаа айдап бараткан аялдарды токтотуп, түрдүү шылтоолор менен айдоочулук күбөлүктөрүн алып, машинелерин айып жайга токтотууда.

Аты-жөнүн билдиргиси келбеген жергиликтүү тургундардын айтымында, унаа айдаган аялдарга каршы мындай рейддер шаарда бир жумадан берип жүрүп жатат.

“Мисалы, айдоочуну токтоткон полиция кызматкерлери автоунаага кошумча жабдуу орнотулганын айтып, бирок ал жабдууларга тыюу салынганы тууралуу чечимди же мыйзамды көрсөтпөй жатышат. Мындай шылтоо менен ондогон аялдын айдоочулук күбөлүгүн алып, машинелерин айып жайга токтотушту”, – деди жергиликтүү аялдардын бири.

Анын айтымында, полициянын мындай рейддерине кабылган аялдардын көбү Түркмөнбашы шаардык акимчилигине кайрылып, жол полициясынын кызматкерлерине карата чара көрүүнү талап кылышкан.

“Бирок акимчиликтин өкүлдөрү даттанууларыбызды уккандын ордуна кайра бизди айыпташты. Кызматкерлердин бири: “Аялдарга унаа айдап эмне кереги бар? Үйдө отуруп, балдарыңарды тарбиялагыла. Сайраңдаганды гана билесиңер. Жаш жигиттерге көз салгандан уялбайсыңарбы? Силердин чоң энеңер менен апаңар унаа айдады беле? Жөн койсо башка чыгып кетесиңер” деп аялдарды акимчиликтен кууп чыкты”, – деди ал.

Түркмөнстан Конституциясынын 29-беренесине ылайык, өлкөдө аялдар менен эркектер бирдей укуктарга, эркиндикке ээ жана аларды ишке ашырууда бирдей мүмкүнчүлүктөрү бар. Аталган беренеде “Жынысына карап тең укуктуулукту бузгандар мыйзамда каралган нормалар менен жоопкерчиликке тартылат” деп жазылган.

Бирок иш жүзүндө өлкөдө бир нече жылдан бери аялдардын автоунаа айдоо укуктары чектелип келет. Полиция кызматкерлери ойдон чыгарылган түрдүү шылтоолор менен алардын айдоочулук күбөлүктөрүн алып, кайра кайтарып бербей койгон учурлар көп катталган.

Түркмөнстанда быйыл мартта бийликке мурдагы президенттин уулу Сердар Бердымухамедовдун келиши менен аялдардын тышкы келбетинн көзөмөл күчөгөн. Апрелде өлкөдө айрым косметикалык операцияларга, маселен төштүн пластикасына же татуажга тыюу салынып, көчөдө тырмак жана кирпик чаптап алгандарды кармоо учурлары көбөйгөн.

WWW.