1,902 Бардыгы /

БАТКЕН. Баткен облусуна караштуу Кадамжай районунда Жол кыймыл коопсуздугун камсыздоо кызматынын үч тескөөчүсү коррупцияга шектелип камалды. Бул жөнүндө Улуттук коопсуздук комитетинен кабарлашты.

– Тергеп-иликтөөнүн жүрүшүндө ички иштер органынын өкүлдөрү башка адамдар менен бирге жүк ташыган машинанын айдоочуларынан такай акча алып турушкан. Мунун натыйжасында Кадамжай аркылуу товарларды аткезчилик жол менен ташууга ыңгайлуу шарттар жаратылган. УКМК ушул тапта бул коррупциялык схемага тиешеси бар башка адамдарды дагы аныктоого абдан катуу аракет кылып жатат, – деп айтылат УКМК тараткан маалыматта.

 Баса, Баткендеги Жол кыймыл коопсуздугун камсыздоо кызматынын үч тескөөчүсүнөн тышкары дагы органда таптакыр иштебеген бир жаран кармалды.

Буга дейре Жогорку Кеңеште Баткенде район-шаарлар ортосунда аткезчиликке каршы уюштурулган көзөмөл бекеттерден улам бир канча жолу маселе көтөрүлгөн. Мунун айынан атайын кызматтын төрагасы Камчыбек Ташиев менен «Бүтүн Кыргызстан» фракциясынын лидери Адахан Мадумаров дагы кайым айтышкан. Адахан Мадумаров бул бекеттер коррупцияга даңгыр жол ачкандыгын, анын кесепетинен дыйкан-фермерлердин түйшүгү көбөйгөндүгүн жар салган. Камчыбек Ташиев бул дооматты дароо четке кагып, тескерисинче, депутаттын өзүн күнөөлөгөн эле.

Кыргызстан Тажикстан менен чек арасын өткөн жылдын апрель айындагы куралдуу жаңжалдан кийин бир тараптуу жапкан. Мындан кийин деле аткезчилик таптакыр токтобой жаткандыгы айтылып, жергиликтүүлөр ага каршы күрөштү күчөтүү талабын далай ирет көтөрүшкөн.

Алишер ТОКСОНБАЕВ, өз кабарчы