1,494 Бардыгы /

ОШ. Кыргызстандын Түштүк башкалаасындагы Токтогул сейил багында “Изюм” конок үйү мыйзамсыз курулган. Бул туурасында Башкы прокуратуранын басма сөз кызматынан билдиришти.

Маалыматка караганда, Ош шаардык прокуратурасы тарабынан Кыргыз Республикасынын “Шаар куруу жана архитектура” мыйзамынын аткарылышы боюнча текшерүү жүргүзүлдү. Анын жүрүшүндө Ош шаарындагы “Токтогул” сеймил багынын аянтына Н.Т. аттуу жаран Ош шаарынын мэриясынын муниципалдык менчик башкармалыгынын балансында турган жер аянтына 3 кабаттуу “Изюм” конок үйүн мыйзамсыз түрдө куруп алгандыгы аныкталды. Ал эми мурдагы Мамэкотехинспекциясынын регионалдык башкармалыгынын жооптуу кызматкерлери жеке пайда табуу максатын көздөшүп, сейил бактын ичине капиталдык курулуш мыйзамсыз жүргүзүлгөндүгүн билип туруп, конок үйүн пайдалануу үчүн кабыл алышкан.

Аталган фактынын негизинде “Изюм” конок үйүнүн ээси Н.Т. жана мурдагы Мамэкотехинспекциясынын жооптуу кызматкерлерине карата Кылмыш–Жаза Кодексинин 337-беренеси (“Кызмат абалынан кыянаттык менен пайдалануу”) менен кылмыш иши козголуп, ушул тапта тергөө жараяны улантылууда.

Алишер ТОКСОНБАЕВ, өз кабарчы