744 Бардыгы /

БАТКЕН. Журналист Арзыгүл Галымбетованын өлүмүнө шектелген блогер Батмакан Жолболдуева Баткен райондук соту тарабынан акталып, ал эми башка үч иш боюнча айыптуу деп табылды. Бул туурасында Жолдубаеванын жактоочусу Назгүл Сүйүнбаева билдирди.

Маалыматка караганда, Батмакан Жолболдуева «Этиятсыздыктан өлүмгө алып келүү» беренеси боюнча акталды. Ал эми «Бейбаштык», «Жекече жашоонун кол тийбестигин бузуу» жана «Документтерди жасалмалоо» боюнча күнөөлүү деп табылып, эки жылга пробациялык көзөмөл дайындалды. Мындан тышкары эки жылдык мөөнөткө блогердик ишмердүүлүгүнө дагы тыюу салынды.

Эске салчу жагдай: 37 жаштагы журналист Арзыгүл Галымбетова өткөн жылдын 26-мартына караган түнү жүрөгү кармап каза тапкандыгы айтылган. Андан кийин 2021-жылдын 25-март күнү журналист Баткен облустук милициясына келип «Батма-бат» Youtube каналында иштеген блогер кыз аброюма шек келтирип, жаман сөздөр менен каралап жатат деген таризде арыз жазган. Милиция ошол эле күнү арыздануучунун ден соолугу начарлап ооруканага кайрылып, дарыгерлердин жардамына карабай каза тапкандыгын билдирген.

Баса, 33 жаштагы блогер журналисттин өлүмү боюнча эки кылмыш иши боюнча суралып жаткан. Былтыр марттын башында Кылмыш-Жаза Кодексинин 127-беренеси («Этиятсыздыктан өлүмгө алып келүү») боюнча кылмыш иши козголгон. Андан кийин ага 190-берене («Жеке жашоонун кол тийбестигин бузуу») менен 280-берене («Бейбаштык») кошулган. Бирок, былтыр август айында блогер \й камагына чыгарылган.

Алишер ТОКСОНБАЕВ, өз кабарчы