951 Бардыгы /

          НАРЫН. Кыргыз Республикасынын  УКМКсына караштуу мамлекеттик Чек ара кызматынын маалымат жана коммуникация башкармалыгынын маалыматына караганда, Кыргыз чек арачылары Нарын облусунда аткезчилик жүгүн – жок болуп кетүү коркунучундагы өсүмдүктүн тамырын акыры кармашты.

          Кечээ. болжол менен саат 22.30да Кыргыз Республикасынын  УКМКсына караштуу мамлекеттик Чек ара кызматынынНарын облусу боюнча башкармалыгынын “Муз-Төр” чек ара беектине ВАЗ-2121 «Нива» маркасындагы автоунаа келген. Транспорт каражатын текшерүү маалында Чек ара кезмети белгисиз өсүмдүктүн тамырлары салынган 3 капты табышкан. Булардын жалпы салмагы 53 кило 400 грамм экен. Кийинчерээк автоунаанын айдоочусу – Кыргыз Республикасынын  жараны Ж.Ж., Кыргызстандын аймагында казууга жана мыйзамсыз жыйноого катуу тыюу салынган эндик (Арнебия) өсүмдүгүнүн тамырларын чек ара бекети аркылуу мыйзамсыз алып өтүүгө аракет кылгандыгы аныкталып олтурат.

          Кармалган жаран Ж.Ж. жана эндиктин тамырлары салынган каптар бүт  жаратылыш ресурстары, экология жана техникалык көзөмөл министрлигинин аймактык бөлүмүнүн кызматкерлерине өткөрүлүп берилди. Кыргыз Республикасынын “Укук бузуулар” жөнүндө кодексинин 264-беренесине ылайык Ж.Ж. аттуу жаран  жапайы өсүмдүктөрдүн сырьесун, же алардын бөлүгүн  сатып алуунун жана сатуунун тартибин бузгандыгы үчүн административдик жоопкерчиликке жана айып пул төлөөгө тартылды.

          ЭНДИК ӨСҮМДҮГҮ жоголуп кетүү коркунучундагы өсүмдүктөрдүн түрүнө кирет. Эндик Азия жана Түндүк Африкада өскөн дарылык касиети бар чөп (Boraginaceae тукуму), жалбырактары кезектешкен түрдө өсүп, жашына жараша сары же кызгылт көк гүл ачкан өсүмдүк болуп саналат. Тамырдын курамында шиконин аталган биологиялык зат дагы бар.

Алишер ТОКСОНБАЕВ, өз кабарчы