951 Бардыгы /

      Эл аралык жаңы аэропорт Ошко дагы, Жалал-Абад шаарына дагы салынат. Ал эми азыркы аэропорттордун ордуна ипотекага көп кабаттуу үйлөрдү куруу пландаштырылууда. Бул туурасында Президенттин басма сөз катчысы Аскат Алагөзов билдирди.

     Президенттин басма сөз катчысы Аскат Алагөзов соцтармакта тарап жаткан «Ошко пландалган аэропорт Жалал-Абадга салынмай болуптур» деген билдирүүлөрдү төгүндөп, жаңы аэропорт эки шаарга тең курулаарын баса белгиледи.

     – Жалган жана чагымчыл маалымат таратуу тийиштүү мыйзамдардын чегинде катуу тескелээрин, муну үчүн жоопкерчилик каралгандыгын дагы бир ирет эске салабыз! Үстүбүздөгү жылдын майында мамлекет башчысы Садыр Жапаров жаңы салына турган аэропорттордун долбоорлору менен жеринде таанышкан. Анда Ош жана Жалал-Абад шаарларындагы аэропорттордун ордуна ипотекалык негизде берүү үчүн көп кабаттуу үйлөрдү куруу каралганы ачык маалымдалган , — деп кошумчалады Президенттин басма сөз катчысы Аскат Алагөзов.

     Эске салчу жагдай: УКМК төрагасы Көк-Жаңгак шаарындагы маданият үйүнүн ачылышында Жалал-Абад шаарына дүйнөнүн төрт бурчуна уча турган Эл аралык маанидеги чоң аэропорт куруларын шардана кылган.

Алишер ТОКСОНБАЕВ, өз кабарчы