555 Бардыгы /

Баткен облусунда ушул тапта 3 миң үй-бүлө акысыз жана эң төмөнкү баадагы көмүр менен камсыз этилди. Бул туурасында президенттин Баткен облусундагы Өкүлчүлүгүнөн билдиришти.

Акыркы маалыматка караганда, Баткен облусунун бир жылдык көмүргө ички керектөөсү 129 миң тоннаны түзөт. Мунун арасынан карапаым калктын керектөөсү 98,2 миң тонна. Ошондуктан, бүгүнкү күнгө карата жергиликтүү калктын 74 пайызы көмүр менен толук камсыздалды. Тагыраагы аймакка 72 миң 465 тонна көмүр ташылды. Бул өңүттө облустун район-шаар башчылары, айыл өкмөттөрү көмүр кендери менен түзгөн келишимдердин алкагында элди арзан нарктагы көмүр менен камсыз кылуу максатында жер-жерлерге көмүр жеткирүү иштерин өзгүлтүксүз жүргүзүп келатышат. Ошондуктан. жергиликтүү бийлик органдары тарабынан облус боюнча 2 миң 994 аз камсыз этилген үй- бүлөгө 1 миң 660 тонна көмүр акысыз жана эң арзан баада гана таратылды.

Калкты арзан көмүр менен камсыз кылуу максатында “Кыргызкөмүр”  мамлекеттик ишканасы менен президенттин Баткен облусундагы Өкүлчүлүгү биргеликте калктын аярлуу катмарына жана чек ара жаңжалынан жапа чегишкен тургундарга тоннасы 5 миң сомдон Сүлүктү шаарынын көмүрү жеткирилүүдө. Бүгүнкү күнгө карата “Кыргызкөмүр” мамлекеттик ишканасы менен биргеликте облус калкына 1000 тонна көмүр жеткирилди. Ал эми аймактарда көмүрдүн баасы сортуна жана жол чыгымдарын кошо эсептегенде ар бир райондо орточо 7 миң 500 сомдон 9 миң сомго чейин гана сатылууда жана терилген жогорку сапаттагы көмүр 9-12 миң сомдон сатылат. Бул баа Монополияга каршы жөнгө салуу агенттиги тарабынан бекитилген. “Кара алтын” баасын эч жүйөөсүз көтөрүшкөн жарандарга тийиштүү мекемелер тарабынан дагы абдан катаал чаралар көрүлүүдө.

Белгилей кетчү жагдай: Баткен облусунун билим берүү тармагына 14,6 миң тонна, саламаттыкты сактоо тармагына 2,4 миң тонна көмүр керектелет. Бул тармактарда көмүр маселеси толук кандуу чечилип, акча каражаттары дагы өз убагында которулуп берилген.

Алишер ТОКСОНБАЕВ, өз кабарчы