372 Бардыгы /

Ош облусуна караштуу Кара-Суу районунда Отуз-Адыр каналын оңдоп-түзөө иштери дээрлик аяктап, ал аркылуу суу берилди. Бул туурасында президенттин Ош облусундагы өкүлчүлүгүнөн билдиришти.

Президенттин Ош облусундагы ыйгарым укуктуу Өкүлү Элчибек Жантаев жумушчу сапары менен Кара-Суу районунда болуп, аталган каналдын чаап-тазалоо жумуштары, чугун плиталарын жана темир щиттерин алмаштыруу, ошондой эле бетондоо иштеринин жүрүшүнөн кабар алды. Облус жетекчиси жергиликтүү бийлик өкүлдөрүнүн, суу чарба адистеринин жана дыйкандардын катышуусунда аймакты көрүп чыгып, быйылкы жылдагы сугат иштеринин жүрүшүн жеринде талкуулады. Ал мурун кетирилген каталарды кайталабоо максатында бири-бири менен тыгыз кызматташууга чакырып, сууну натыйжалуу бөлүштүрүү үчүн биргелешип иш алып баруу зарылдыгын билдирди. Ошондой эле кошумча көзөмөл жүргүзүү үчүн видеокөзөмөл камераларын дагы орнотуу тапшырмасы берилди.

Белгилей кетчү жагдай: Ош облусуна караштуу Кара-Суу районунда Отуз-Адыр каналы тээ Союз маалында  1941-жылы башталып, 1948-1956- жылдары элдик ашар жолу менен бүткөрүлгөн. Бүгүнкү күндө каналдын жалпы узундугу 52,4 чакырымды түзөт.

Алишер  ТОКСОНБАЕВ, өз кабарчы