1,662 Бардыгы /

ЖАЛАЛ-АБАД. Жалал-Абад милициясы ооруканадан 1 млн. 600 миӊ сомдук УЗИ аппаратын уурдаган шектүү жаранды кармады.

Жалал-Абад ОИИБдин басма сөз кызматы билдиргендей, 2024-жылдын 16-май күнү саат 08:15 чамасында, Жалал-Абад ШИИБдин 102 номерине телефон чалуу болуп, анда И.Ч. аттуу жаран ошол эле күнү саат 08:10 чамасында Жалал-Абад областтык ооруканасынын жаш балдарды дарылоо бөлүмүндө жайгашкан УЗИ бөлмөсүнө жумушуна келип, эшигинин ачкычы бузук жана ачык экендигин көрүп, бөлмөсүндөгү  УЗИ (Чайсан) аппаратын белгисиз кылмышкерлер тарабынан уурдап кеткендигин билдирген.

Натыйжада Жалал-Абад областтык ооруканасынын жаш балдарды дарылоо бөлүмүнө 1 661 727 сомдук материалдык зыян келтирилген. Жогорудагы аталган маалымат ошол эле күнү Жалал-Абад ШИИБдин КБРне катталып, Кыргыз Республикасынын КЖКнын 205-беренесинин (Уурулук) негизинде кылмыш иши козголуп, кылмыштын бетин ачуу максатында тиешелүү тергөө тапшырмалары берилген. 

Жалал-Абад ШИИБдин ыкчам кызматкерлери тарабынан кылмыштын изин суутпай ачуу максатында жүргүзгөн иликтөө иштеринин натыйжасында кылмышка шектүү катары Жалал-Абад шаарынын 1986-ж.т. тургуну  А.А. кармалып, жанынан уурдалган далил буюмдар табылып алынган. Ошондой эле тергөө амалдарын жүргүзүүдө шектүү катары кармалган А.А. буга чейин бир нече жолу соттолгондугу жана уурулук фактысы менен издөөдө жүргөндүгү такталган.

 Бүгүнкү күндө шектүү 1986-ж.т. А.А. Жалал-Абад шаардык соту тарабынан 20 күнгө камакка алынган.

Учурда тергөө амалдары жүргүзүлүп жатат.