243 Бардыгы /

Чек арадан адамдарды жашыруун түрдө гана өткөрүп, а түгүл дары-дармектерди дагы мыйзамсыз ташыган деп шектелип Кыргыз жараны кармалгандыгын Ош облустук ички иштер башкармалыгынан билдиришти. Ошентип, чогултулган материалдардын негизинде мыйзамсыз миграция агымдарын уюштуруу боюнча олуттуу кылмыш иши козголду.

Маалыматка караганда, акыркы сааттарда Кыргыз-Өзбек чекарасындагы “Достук” өткөрмө бекетине жакын жердеги чек арадан мыйзамсыз өткөн 40 жаштагы Х.Б. аттуу Өзбек жараны кармалды. Материалдын негизинде чек арадан мыйзамсыз өтүү боюнча кылмыш иши козголуп, тергөөнүн жүрүшүндө Өзбекстан жарандарын жашыруун өткөрүп жүргөндөр дагы бар экендиги ашкереленди. Ошондой эле мыйзамсыз миграция каналдарын уюштуруу боюнча дагы бир кылмыш иши козголгондугу баса белгиленди.

Баса, жүргүзүлгөн ыкчам издөө иштердин натыйжасында ушул жылдын 12-апрелинин түнүндө Ноокен районунун 39 жаштагы К.Х. аттуу тургуну акча алып, Өзбек жарандарын чек арадан мыйзамсыз өткөрүп жаткан жеринен кармалып, дароо эле камакка алынды. Шектүүнүн жанынан атайын белги коюлган акча каржаттары, ошондой эле түн ичинде көрүүчү дүрбү дагы далил буюм сыңары алынды. 

Соңку сааттарда айыпталуучунун үйүндө атайын тинтүү дагы жүргүзүлүп, жер төлөсүнөн аткезчилик жол менен келген баасы болжол менен 30 миң доларлык 87 куту 41 дары-дармектин түрү (психотроптук дарылар да бар) табылды. Буларга тийиштүү экспертизалар дагы дайындалды.

Алишер ТОСКОНБАЕВ, өз кабарчы