444 Бардыгы /

ЖАЛАЛ-АБАД. 15-май күнү реконструкциялоодон өткөрүлгөн “Курманбек” стадиону пайдаланууга берилди.

Иш-чарага Министрлер Кабинетинин төрагасынын орун басары-УКМК төрагасы Камчыбек Ташиев, Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, жергиликтүү бийлик жана шаар тургундары катышты.

Жалал-Абад шаарындагы “Курманбек” атындагы стадион 1967-жылы ашар жолу менен курулган. Ал эми 2015-2016-жылдары аталган стадиондун айрым бөлүктөрү оңдоп-түзөөдөн өткөрүлгөн. Бирок, стадион эл аралык мелдештерди өткөрүү талаптарына жооп бербегендиктен, 2024-жылдын башында стадионду заман талабына төп келтирүү үчүн реконструкциялоо иши башталган.

Ошентип, Кыргызстандын тарыхында алгачкы ирет Жалал-Абад шаарында гибриддик футбол талаасы курулду. Тагыраагы, стадион мурдагы калыбынан 100 % өзгөртүлүп, сугаруу системасы, жарыктандыруусу, көрүүчүлөр отурган отургучтардын 65%ы жана VIP залы толугу менен жаңыланды. Ошондой эле, спортчулардын кийинүүчү, жунуучу жайлары, эс алуучу бөлмөлөрү, машыктыруучулардын бөлмөлөрү да толугу менен жаңыртылып, 50 чарчы метрди түзгөн чоң экран орнотулду.

Мындан сырткары, футболчулардын коопсуздугу үчүн футбол талаасынын айланасы тосулуп, ал менен катар стадиондун сырткы короосунун тосмолору алмаштырылды.

Стадиондун футбол талаасы жана жарыктандыруусун жаңылоо демөөрчүлөр тарабынан каржыланса, калган курулуштардын бары шаар казынан жасалды. Ага дээрлик 70 млн. сомдон акча каражаты жумшалды.

“Курманбек” атындагы стадиондун учурдагы жалпы аянты 3,68 гектарды түзөт. Ал эми кезинде жеке жактарга өтүп кеткен стадиондун 0,54 гектар жер аянтын кайтарып алуу боюнча иш шаардык сотто каралып жатат. Ал жер аянттар стадионго кайтарылса көрктөндүрүү, жашылдандыруу иши колго алынып, максаттуу пайдалануу боюнча иш-аракеттер жүргүзүлөт.