483 Бардыгы /

           Жалал-Абад облусундагы «Бек-Абад – автожол» көзөмөл-өткөрүү бекетинин аскер кызматкерлери системалуу түрдө акча каражатын талап кылгандыгы үчүн кармалышты. Бул туурасында Улуттук коопсуздук мамлекеттик комитетинен билдиришти.

Атайын кызмат тарабынан мамлекеттик органдардагы коррупцияны жоюу боюнча иштеринин алкагында Жалал-Абад облусунун Сузак районундагы «Бек-Абад – автожол» көзөмөл-өткөрүү бекетинде иштешкен мамлекеттик Чек ара кызматынын аскер кызматкерлери тарабынан чет элдик жарандардан жана ишкерлерден системалуу түрдө акча талап кылуу фактысы акыры ашкереленди. Тактап айтканда, козголгон кылмыш ишинин алкагында аталган чек ара заставасынын аскер кызматкерлери тарабынан кызматтык абалынан кыянаттык менен пайдалануу фактылары аныкталды. Анткени, алар колдонуудагы көрсөтмөлөрдү орой бузуу менен материалдык компенсация төлөп, мамлекеттик чек ара аркылуу товарларды мыйзамсыз түрдө алып өтүүгө активдүү көмөктөшүшкөн.

2024-жылдын 26-июнунда УКМКнын мамлекеттик Чек ара кызматынын жетекчилигинин көмөгү аркасында жүргүзүлгөн иш-чаралардын жыйынтыгында, акча каражаттарын кабыл алуу учурунда өткөрүү бекетинин кезмет башчысы А.О.А., ошондой эле бул коррупциялык схемага аралашкан анын айрым кол алдындагы кызматкерлери пара менен кармалышты. Ушул тапта УКМК тарабынан жогоруда аталган кылмыштарга мамлекеттик Чек ара кызматынын башка кызмат адамдарынын катыштыгы бар экендигин аныктоого багытталган ыкчам-иликтөө иш-чаралары абдан кызуу жүргүзүлүүдө.

Эскерте кетчүү жагдай: Жалал-Абад облусундагы «Бек-Абад – автожол» көзөмөл-өткөрүү бекети 2023-жылдын 1-сентябрынан тартып өз ишин кайрадан жанданткан. Мындан улам көзөмөл-өткөрүү бекетинен Кыргызстан жана Өзбекстан, ошондой эле үчүнчү өлкөлөрдүн жарандары, жеке пайдаланыла турчу товарларды эске албаганда кайсы мамлекетке тийиштиги бар экендигине карабастан жүк, товар жана жаныбарлары жок жеңил транспорт каражаттары чек араны кесип өтө алышат.

Алишер ТОКСОНБАЕВ, өз кабарчы