336 Бардыгы /

16-июлда Ош шаары жана Ош облусуна Өзбекстандын Андижан облусунан селден жабыркагандар үчүн гуманитардык жардам келгенин Ош шаардык мэриясынын басма сөз кызматы билдирди.

Маалыматка ылайык, гумантардык жардамды Андижан облусунун губернатору Шухратбек Абдурахманов алып келип, аны “Достук” чек ара бекетинен Ош шаарынын мэри Бакытбек Жетигенов, Президенттин Ош облусундагы ыйгарым укуктуу өкүлү Эльчибек Джантаев, Тышкы иштер министрлигинин жана Өзбекстандын Ош шаарындагы Башкы консулдугунун өкүлдөрү тосуп алышты.

Селден жабыркаган жарандарга келген гуманитардык жардам 13 жүк ташуучу унаа менен жеткирилди.

Жалпы 200 тонналык гуманитардык жардам курулуш материалдар, кийим-кечек, гигиеналык каражаттар жана азык-түлүктөрдөн турат.

Шухратбек Абдурахманов “Манас-Ата” муниципалдык аймактык башкармалыгындагы Жаңы-Маала көчөсүнүн тургундарына барып, суудан жабыркаган 17 үйдү көрүп чыкты.