288 Бардыгы /

Ош шаарынын прокуратурасы Ак-Буура дарыясынын үстүндө курулушка уруксат берүүчү архитектуралык документтери жок он көпүрө жана соода түйүндөр аныкталгандыгын шардана кылды. Баары теё Ак-Буура дарыясын бойлото Кара-Суу жана Базар көчөлөрүнө катарынан салынган.

Көзөмөлдөөчү орган Ош шаарынын архитектуралык-курулушту көзөмөлдөө боюнча шаардык башкармалыгы, Ош регионалдык шаар курулушу жана архитектура боюнча башкармалыгы, Жерди жана сууну көзөмөлдөө боюнча кызматы, Ош бассейндик суу чарба башкармалыгынын жана Жер ресурстары, кадастр, геодезия жана картография боюнча мамлекеттик агенттигинин кызмат адамдары кызмат абалынан кыянаттык менен пайдаланып, милдеттерин так аткарган эмес деп эсептейт. Ушул тапта аталган фактылардын негизинде Кылмыш-Жаза Кодексинин 337-беренеси («Кызмат абалын кыянаттык менен пайдалануу») менен кылмыш иши козголуп, тергөө кыызуу жүрүп жатат.

Айтмакчы, ушул жылдын 14-июлунда катуу жаандан кийин Ак-Буура дарыясы күтүүсүз күпүлдөп кирген. Анан дароо кыян жүрүп, Оштогу борбордук базарды жана дагы чет жакадагы айылдарды катарынан сел каптаган. Жаратылыш кырсыгынан беш киши каза таап, а түгүл бир нече машинени сел агызып, үйлөр, көпүрөлөр жана жолдор жарактан чыккан. Соодагерлер дагы чоң чыгымга учураган. Ошто жана Кара-Суу районунда жүздөгөн турак жайлар зыян тартты. Улуттук коопсуздук мамлекеттик комитетинин төрагасы Камчыбек Ташиев Ак-Буура суусунун боюна салынган мыйзамсыз курулуштар, көпүрөлөр, эс алуучу жайлар тегиз тазалана тургандыгын айткан. Ал ошондой эле мыйзамсыз курулушка уруксат берген кызматкерлер дагы сөзсүз жоопко тартылаарын эскерткен.

Алишер ТОКСОНБАЕВ, өз кабарчы