159 Бардыгы /

Улуттук коопсуздук боюнча мамлекеттик комитети Ош облусуна караштуу Кара-Суу районунун акими Темирболот Абыкеевдин кармалышы боюнча түшүндүрмө таратты. Мекеменин басма сөз кызматынан билдиришкендей, аталган райондун башчысы Абыкеев ири өлчөмдө пара алууга шек саналып гана кармалды. 

Маалыматка караганда, атайын кызматка Кара-Суу районундагы Ынтымак айыл өкмөтүнүн жер тилкелерин мыйзамсыз бөлүштүрүүдө Темирболот Абыкеевдин дагы катыштыгы бар экендиги туурасында маалымат түшүп, буларды териштирүү учурунда анын ири өлчөмдө акча алгандыгы дагы аныкталды. Ошондуктан, аким УКМКнын Ош шаары жана облусу боюнча башкармалыгына суракка чакырылып, андан соң гана кармалып, анан камалып олтурат. 

Ош облустук сотунун басма сөз кызматы Темирболот Абыкеевдин бөгөт чарасы Ош шаардык сотунда 23-июлунда эле каралып, аны тилкат менен бошоткондугун билдирген. Тилекке каршы, Абыкеев өзү, же анын жактоочусу акимдин кармалышы боюнча комментарий берише элек. Ушул жылдын 19-июлунда УКМК төрагасы Камчыбек Ташиев Кара-Суу районунда элге деп бөлүнгөн 138 гектарга байланыштуу маселени көтөрүп, жер тилкелери кадимкидей эле сатылып жаткандыгын шардана кылган. 

Айтмакчы, 39 жаштагы Темирболот Абыкеев 2023-жылдын декабрында Кара-Суу райоунун акимдигине дайындалган. Буга чейин Нарын облусунда айыл өкмөт башчысы, анан дагы Ош облусунун Чоң-Алай районунда аким сыңары иштеген.

Алишер ТОКСОНБАЕВ өз кабарчы