204 Бардыгы /

Райондук мамлекеттик администрациясынын жыйындар залында БУУнун Азык-түлүк жана айыл чарба уюмунун (ФАО) “Кыргыз Республикасындагы токойлорго жана жайыттарга климаттык инвестициялар аркылуу көмүртектин секвестрациясы-CS FOR” долбоорунун Улуттук байкоочу кеңешинин үчүнчү отуруму болуп өттү.

Отурумга Тогуз-Торо районунун акими Манас Мураталиев, ФАОнун Европа жана Борбордук Азия боюнча аймактык өкүлүнүн орун басары Набил Ганджи, ФАО уюмунун Кыргыз Республикасындагы жаңы өкүлү Олег Гучгелдиев, улуттук байкоочу кеңештин мүчөлөрү, Кыргыз Республикасынын Өзгөчө кырдаалдар, Суу чарба, айыл чарба жана кайра иштетүү өнөр жай, Жаратылыш ресурстары, Экология жана техникалык көзөмөл министрликтеринин өкүлдөрү, Өзгөн, Сузак, Тогуз-Торо жана Ак-Талаа райондорунун райондук мамлекеттик администрацияларынын орун басарлары, АРИС, Орус-Кыргыз өнүктүрүү фонду жана райондо долбоор тарабынан жаңы түзүлгөн Жаратылышты башкаруу жамааттык топтун мүчөлөрү, айыл өкмөт башчылары катышты.

Аким Манас Мураталиев: «Биздин район бул ФАО уюмунун долбооруна төртүнчү максаттуу аймак катары кирүүсү жөн эмес, жыл өткөн сайын климаттын өзгөрүшү малдын санынын кескин көбөйүүсү, жайыттардын деградацияга учуроосуна алып келүүдө жана тоют маселеси да көйгөй болууда. Бул долбоор жана өнөктөштөр ФАО, АРИС менен биргеликте тыгыз иштеп, токой жайыттарды жакшыртуу менен сактап калуу аракетин чоогу көрөлү”- деди М.Мураталиев.

Андан сырткары аким Манас Мураталиев долбоордун өкүлдөрүн жеке кабыл алды.

ФАОнун Европа жана Борбордук Азия боюнча аймактык өкүлүнүн орун басары Набил Ганджи: «Бул долбоор парник газдарынын абага бөлүнүп чыгуусун азайтуу жана фермерлер менен малчылардын климаттын өзгөрүүсүнө туруктуулугун жогорулатууга эбегейсиз зор салым кошо турчу потенциалга ээ. Ошондуктан өнөктөштөр, жергиликтүү өз алдынча башкаруу органдарынын өкүлдөрү, жергиликтүү калк колдоп, ийгиликтүү ишке ашырабыз деген ойдомун»,- деди Н.Ганджи

Жыйындын жүрүшүндө долбоордун улуттук координатору, эксперттери жана негизги өнөктөштөр өткөрүлгөн негизги иш-чараларды, натыйжалары тууралуу кеңири маалымат берип, кийинки экинчи жарым жылга түзүлгөн иш план жана бюджет менен таанышып, бекитишти.

Соңунда Атай айыл аймагынын Кара-Булак жайлоосуна барып жайыттардын абалын жеринен көрүп, жергиликтүү калк, жайыт пайдалануучулар менен маек куруп, көйгөйлөрдү өз жеринен угушту.

Элиза Акжолтоева