27 Бардыгы /

Президент Садыр Жапаров бүгүн, 31-августта, Улуттук коопсуздук мамлекеттик комитетинин төрагасы Камчыбек Кыдыршаевич Ташиевге “генерал-полковник” жогорку аскердик наамын ыйгарды.

Мамлекет башчы, Камчыбек Ташиевдин өлкөнүн улуттук коопсуздугун чыңдоо, чек араны бекемдөө жана күч органдарын реформалоо боюнча жасаган иш-аракеттери майнаптуу жыйынтык көргөзгөнүн белгиледи.

“Камчыбек Кыдыршаевичтин өлкөнүн улуттук коопсуздугун чыңдоо, чек араны бекемдөө жана күч органдарын реформалоо боюнча жасаган иш-аракеттерин жалпы журтубуз жакшы билет. Ал эми улуттук экономикабызга кедергисин тийгизип, эгемендик жылдарында тамырын терең жайган коррупция менен келишкис күрөш жүргүзүп, жеке өмүрүнө коркунуч келиши мүмкүн экенине карабай, эбегейсиз иштерди жүргүзүп келаткандыгын да баса белгилеп айтып кетейин”,-деди Жапаров.

Белгилей кетсек, Камчыбек Ташиевге буга чейин генерал-лейтенант чини, 2022-жылы президент ага Кыргыз Республикасынын баатыры наамын ыйгарган эле.

Мындан сырткары Жапаров, Кара-Кыргыз автономиялуу облусунун түзүлгөндүгүнүн 100 жылдыгына жана Кыргыз Республикасынын Эгемендүүлүк күнүнө карата өлкө жана эл алдында сиңирген эмгеги үчүн мамлекеттик өзгөчө наам-белгилери ыйгарылган инсандарга бир катар мамлекеттик сыйлыктарды тапшырды.