3 Бардыгы /

        Ош облусуна караштуу Кара-Суу районунда мал жандыктарды уурдоо фактысы боюнча милицияга эки жаран даттанышкан. Бул туурасында Ош облустук ички иштер башкармалыгынын басма сөз кызматынан билдиришти.

        Маалыматка караганда, ушул жылдын 24-июль күнү Кара-Суу райондук ички иштер бөлүмүнө Отуз-Адыр айыл өкмөтүнүн 1969-жылы туулган А.М. аттуу тургуну арыз менен кайрылган. Анда үстүбүздөгү жылдын 24-июль күнү таңга маал үйүнүн жанына байлап койгон жеринен 1 баш малды белгисиз адамдар уурдап кетишкендигин билдирген. Ушундай эле арыз менен 2024-жылдын 24-август күнү Кара-Суу районунун 1965-жылы туулган З.И. деген тургуну арызданган. Анда деле ушул жылдын 10-август күнү таңга маал талаада аркандалып турган жеринен 1 баш малды белгисиз адамдар уурдап кетишкендигин кабарлаган.

        Ошентип, аталган фактылар дароо каттоого алынып, тергөөгө чейинки текшерүү иштери башталган. Чогултулган материалдын негизинде Кылмыш-Жаза кодексинин 205-1-беренеси (Мал уурдоо) боюнча кылмыш иши козголуп, ыкчам тергөө амалдары башталган. Жүргүзүлгөн ыкчам-издөө иш-чаралардын натыйжасында кылмышка шектүү Өзгөн районунун 1982-жылы туулган Д.А. (КР Ички иштер министрлигинин уюшкан кылмыштуу топтун мүчөсү катары каттосунда турат) жана 1991-жылы туулган Ж.уулу Э. аттуу тургундары кармалышып, убактылуу кармоочу жайга киргизилди.

        Шектүүлөр уурдалган малдарды башка аймактын базарына алып барып сатып жибергендеги аныкталды. Ушул тапта Кара-Суу райондук ички иштер бөлүмүнүн Кылмыш иликтөө бөлүмүнүн кызматкерлери тарабынан уурдалган малдарды ээлерине кайтаруу жана шектүүлөрдүн башка кылмыштарга дагы тиешеси бардыгын аныктоо боюнча ыкчам-издөө иш-чаралары жүрүп жатат.

Алишер ТОКСОНБАЕВ, өз кабарчы