9 Бардыгы /

Кыргыз Республикасынын Министрлер Кабинетинин төрагасынын орун басары Эдил Байсалов түркиялык TRT World басылмасына маек курду. Анда Байсалов Кыргызстан Орусия менен Украинанын ортосундагы конфликтте нейтралдуу позициясынан эч тайбай тургандыгын ачыктады.

Кыргызстан биринчи күндөн тартып өз ара кагылышууну токтотуп, тынчтык жолу менен сүйлөшүүлөрдү жүргүзүүгө гана чакырган. Биз башында эле БУУнун Уставын сыйлоону баса белгилегенбиз, – деп агынан жарылды Кыргыз Республикасынын Министрлер Кабинетинин төрагасынын орун басары Эдил Байсалов.

– Биз Орусия менен дагы, Украина менен дагы тыгыз байланышта болгондуктан, бул жерде (Кыргызстанда) эки өлкөнүн тең өкүлдөрү жашашат. Бирок, биздин приоритет – ички прогресс. Эл аралык деңгээлде биз бардык өнөктөштөр менен практикалык мамилени гана сактайбыз, БУУ жана аймактык органдардын ишине активдүү катышабыз, ар кандай сырткы басымга каршы турабыз. Бирок, биз кайсы бир тарапты тандабайбыз. Биз жеке улуттук өнүгүүбүздөн кайсы бир нерсени жогору койбойбуз! Ошондой эле Кыргыз Республикасынын вице-премьер-министри Эдил Байсалов Түрк журналистинин «Кыргызстан Орусиянын таасирине кабылбайбы?» деген суроосуна жооп кайтарды:

– Биз баш тартуу популярдуу деп эле Орусиядан баш тартып кетпейбиз. Бул биздин Улуттук кызыкчылыктарыбызга дагы таптакыр туура келбейт жана мүмкүн эмес! Орусия биздин негизги соода өнөктөшүбүз экени шексиз. Мен баса белгилеп кетейин: биз, айрыкча банк секторубуз. сакциялардын шартында жашап жатабыз. Бирок, биз чыдайбыз Кыргызстан геосаясий оюндарга аралашпайт! Биз бизди Улуттук өнүгүүбүзгө тоскоол болууга, же башка маселелер менен алагды кылууга жол бербейбиз!

Эске салчуу жагдай: жакында Жогорку Кеңеш депутаты Исхак Масалиев Украинанын Орусияга жасаган соккуларын баса белгилеп, Кыргызстан бул конфликтте бир жактуу позицияны ээлей турган убактысы келгендигин, ал Орусия болушу керектигин айткан эле.

Алишер ТОКСОНБАЕВ, өз кабарчы