21 Бардыгы /

Ош облусунда синтетикалык маңзатын аталган облус аймагында кенен-чонон соодалоого шектелген 37 жаштагы Д.А.Р кармалды. Бул туурасында Ички иштер министрлигинин Маңзат менен күрөшүү кызматынын басма сөз кызматынан маалымдашты.

Маалыматка караганда, Ички иштер министрлигинин Маңзат менен күрөшүү кызматынын оперативдүү кызматкерлерине А. аттуу адам «Альфа-ПВП» синтетикалык маңзатын Ош облусунун аймагында сатып жүргөндүгү туурасында ыкчам маалымат түшкөн. Ошентип, 15-январда укук коргоо кызматкерлери кылмышка шектүүнү дароо кармашты. Ал маңзат менен алектенген кылмыштуу топтун мүчөсү сыңары Ички иштер министрлигинин каттоосунда турган 37 жаштагы Д.А.Р экен. Шектүүнү кармоо маалында андан бир мүшөк маңзаты дагы табылды.

Аталган фактынын негизинде Кыргыз Республикасынын Кылмыш-Жаза Кодексинин «Маңзат каражаттарын, психотроптук заттарды жана алардын аналогдорун сатуу максатында мыйзамсыз даярдоо» беренеси менен кылмыш иши козголду. А. аттуу адам убактылуу кармоочу жайга киргизилди. Тергөө жараяны кызуу улантылууда.

Алишер ТОКСОНБАЕВ, өз кабарчы