6 Бардыгы /

Кыргызстандын Түштүк башкалаасындагы Ак-Буура дарыясынын жээгинде жайланышкан бардык мыйзамсыз курулуштар чекесинен сүрдүрүлүп жатат. Бул туурасында Ош шаардык мэриясынан билдиришти.

Ош шаардык мэриясына караштуу муниципалдык менчик башкармалыгы тарабынан мыйзамсыз обьектилерди, мунун ичинде суу коргоо зонасында жайгашкан эс алуучу жайларды демонтаждоо иштери абдан активдештирилди. Муниципалитеттин маалыматына караганда, алардын көбүнүн курулуш жана эксплуатацияга тиешелүү архитектуралык документтери жок. Мурда кыймылсыз мүлктүн ээлери жерди өнүктүрүү максатында гана алышкан.

– Сел учурунда Ак-Буура дарыясынын нугунда курулган бир катар обьектилердин кесепетинен ылдыйкы агымда жайгашкан турак-жайларга суу агып кирип кетүү коркунучу туулган. Ошондой эле «Ошшаарканал» муниципалдык ишканасынын суу түтүктөрү селден улам катуу бузулган, — деп эскертти Ош шаарынын биринчи  вице-мэри Сонунбек Жунусбаев.

Ошентип, көрсөтүлгөн обьектилердин ээлерине түшүндүрүү иштери кызуу жүргүзүлүп, а түгүл ар бирине тиешелүү билдирүүлөр дагы өз убагында берилген.

Алишер ТОКСОНБАЕВ, өз кабарчы