21 Бардыгы /

Өзгөчө кырдаалдар министри Бообек Ажикеев Ош облусунун Араван районуна караштуу Араван-Сай дарыясынын жээгин бекемдөө иштери менен жеринде таанышты.

Маалыматка караганда, Дүйнөлүк банктын каржылоосу аркасында Араван-Сай дарыясынын 800 метр аралыгын бекемдөө пландаштырылган. Бул дарыя жээгиндеги кооптуулукту толугу менен жоюуга өбөлгө гана жаратмакчы. Бообек Ажикеев Аравандын Көк-Сарай тилкесинде курула турган полигондун ордуна дагы көз салып, ушундан соң Арап жана Чертик айылдарын кыдырды. Араван-Сай дарыясынын жээктериндеги эрозиядан улам жаралган кооптуу абалды өз көзү менен көрүп чыгып, тиешелүү жетекчилерге конкреттүү тапшырмаларды дагы берди. Анткени, аталган аймакта 150 турак жай жана 65 гектар айыл чарба жери коркунучта тургандыгы айтылды.

Кошумчалай кетээрибиз: Өзгөчө кырдаалдар министри Бообек Ажикеев Ош жергесине жасаган жумушчу сапарынын алкагында Кара-Суу районундагы Машрап-Сай дарыясынын жээгин бекемдөө, Ош – Сары-Таш – Эркечтам автоунаа жолунун боюндагы коргоочу дамбанын курулушу менен дагы таанышты. Сапарынын соңунда Өзгөн районун кыдырды.

Алишер ТОКСОНБАЕВ өз кабарчы