54 Бардыгы /

Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, облус аймагындагы шаарлардын таза суу системасын жакшыртуу боюнча атайын жыйын өткөрдү. Анда басымдуу Ноокен районунун Кочкор-Ата шаарындагы таза суу курулмаларынан 60 пайызга чейинки жоготуу маселеси талкууланды.

Жыйынга Ноокен районунун акими Таалайбек Ишенбеков, “Кыргызнефтегаз” ачык акционердик коомунун жетекчилик курамы, онлайн тартипте облустагы шаар мэрлери катышты.

Анда коңшу Өзбекстан Республикасында иш алып барып келген “Maya International Infrastructure” жоопкерчилиги чектелген коомунун ишмердүүлүгү тууралуу маалымат берилди. Компания суу курулмаларына атайын жабдууларды орнотуп, спутник аркылуу көзөмөлдөй алат. Анын натыйжасында суунун жоголуу көрсөткүчү кыскарып, курулмалардагы көйгөйдү ыкчам аныктоо мүмкүнчүлүгү жаралат.

Облус башчысы Тилек Текебаев, бул таза суу системасын жакшыртуудагы артыкчылыктуу багыт экенин белгилеп, иш алып баруу үчүн Кочкор-Ата шаары пилоттук негизде тандалганын айтты.