6 Бардыгы /

ОшМУда КМШдагы жаш кинематографисттердин «Сулайман-Тоо» Эл аралык кинофестивалы уюштурулду. Бүгүнкү күнгө карата аталган кароо-сынакка Орусия, Казакстан, Өзбекстан, Тажикстан жана Кыргызстандан жалпы жонунан 200дөн ашуун эмгек келип түштү.

Сынактын шартына ылайык фильмдер эркин темада заманбап тарбия, мектеп жашындагы балдардын көйгөйлөрү жана алар менен күрөшүү темалары таасын чагылдырышы кажет! Ошондой эле кыска метраждуу көркөм, даректүү, анимациялык жана эксперименталдык  болушу дагы шарт. Ар бир тасманын узактыгы 30 мүнөткө чейин деп белгиленди. Ушул тапта келип түшкөн фильмдерди Кыргыз Эл артисти, режиссер жана кинооператор Тынай Ибрагимов башында турган калыстар тобу караштырып жатышат. Жыйынтыгы  ушул жылдын 12-14-май күндөрү өтө турган фестивалда гана чыгарылат. Жеңүүчүлөргө ар түрдүү номинациялар боюнча статуэтка, диплом жана акчалай сыйлыктар кошо тапшырылат. Ошондой эле фестивалдын алкагында  тасмалардын көрсөтүлүшү, мастер-класстар, панелдик талкуулар жана экскурссиялар орун алат.

КМШдагы жаш кинематографисттердин «Сулайман-Тоо» Эл аралык кинофестивалынын негизги максаты – КМШ өлкөлөрүндөгү жаш режиссерлор менен сценаристтердин чыгармачылыгын мындан ары өнүктүрүү жана алардын тажрыйба алмашуусуна дагы өзгөчө шарт түзүү. Иш-чара ОшМУнун Педагогика, искусство жана журналистика институтунун Кино Академиясы тарабынан  демилгеленген.

Алишер ТОКСОНБАЕВ, өз кабарчы