15 Бардыгы /

Баткен облусуна караштуу Баткен районундагы Самаркандек айылындагы “Баткен Мунай” шахтасынан газ чыгып, анда калып калган үч кенчинин экөө каза таап, бирөө эсен-аман куткарылды. Бул туурасында  Өзгөчө кырдаалдар министрлигинен  кабарлашты.

Маалыматка караганда, Өзгөчө кырдаалдар министрлигине маалымат 7-мартта түшкөн. Кырсык баскан жерде Өзгөчө кырдаалдар министрлигинин Тоодон куткаруу кызматынан 13 кызматкер куткаруу иштерин аткарышты. Каза тапкан эки кенчинин сөөгү шахтанын 200 метр тереңдигинен чыгарылып, милиция кызматкерлерине өткөрүлүп берилди. Ал эми үчүнчү адамды тирүү чыгарылып, аны тез жардам кызматын алып кетишти.

“Баткен Мунай” жоопкерчилиги чектелген коомунун шахтасынан иске ууланган 18 кызматкер Баткен райондук ооруканага кайрылышкан. Абалдары  азырынча канааттандырарлык деп бааланууда. Куткаруучулар шахтанын 40 метр тереңдигине тосмо орнотуп, туруктуу жайгашкан ордуна кайтып келишти.

АЛИШЕР ТОКСОНБАЕВ, өз кабарчы