1,658 Бардыгы /

Ош шаарынын мэри М.Мырзакматов мындай сөзүн кечээ, 25-октябрда “Египет” ресторанындагы чоң отурушта солтолордун арыз-муңуна жооп кылып айтканын бүгүн KyrgyzToday.kg маалыматтык порталы “Cолтолор Бишкек баатырдын эстелигин койгонго Бишкектен жер алалбай жатабыз” деп Мелис Мырзакматовго арызданышты” деген теманын астында жазып чыкты.

Маалыматты толугу менен беребиз:

– Кечээ, 25-октябрдын кечинде Ош шаарынын мэри Мелис Мырзакматов Бишкектеги “Египет” ресторанында кыргызга төбөсү көрүнгөн аксакалдарга, тарыхчы-окумуштууларга сый тамак берип масилет курду. Айтылуу Алымбек датка менен Курманжан датканын уулу Абдылдабек баатыр 19-кылымда Орусия падышачылыгына колония болбойбуз деп Кыргызстандын түндүгүнөн келген орус аскерлерине каршы күрөшүп жүрүп, Ооганстанга сүрүлуп кеткен экен. Сөөгү ошол жакта калып, Абдылдабектин ашы берилбей калган дешет. Эми кийинки, 2014-жылы Мелис Мырзакматов ошол көз карандысыздык үчүн күрөшкөн Абдылдабек баатырдын ашын берип, эстелигин коюп, илимий иш-чараларды өткөрүү максатын аксакалдар, тарыхчы-окумуштуулар менен талкуулап, баарлашты.
Иш-чара ортолоп калганда сөз алган кыргыздын Солто уруусунун лидерлеринин бири, экс-аким Адамкалый Чыныбаев: “Биз солто уруусунан чыккан Бишкек баатырга эстелик тургузалы деп Бишкектен жер сурап бир жылдан бери алалбай кыйналдык. Ошто болсо кыргыздын тарыхый инсандарына эстелик коюуга жер дароо бөлүнөт экен. Биздин Бишкек баатырдын эстелигине бийлик жер ыраа көрбөй жатат” деп арызданды.
“Бишкектен Бишкек баатырга жер беришпесе анда Бишкек баатырдын эстелигин Ошко коёлу. Мен Оштон жер да берем, эстелигине да жардам кылам. Бул жерде чечилбесе Ош шаарына келгиле”,- деп Оштун мэри Мелис Мырзакматов убада кылганда ал жерде олтурган аксакалдар, тарыхчы-окумуштуулар дүркүрөтө кол чаап жиберишти.
http://inter.kg