1,145 Бардыгы /

ОШ. Ош шаардык Кеңешинин депутаттары ВИЧ-СПИД дартына чалдыккан балдардын сүтүнө калаа бюджетинен жетиштүү каражат ажыратуудан биротоло баш тартышты. Бул туурасында Саламаттыкты сактоо министрлигинин алдындагы Коомдук Кеңештин мүчөсү Айбар Султангазиев ачыктады.

– Ушул тапта Ош шаардык Кеңешинин депутаттары 2019-жылга түштүк башкалаасынын бюджетин карап жатышат. Ош шаарындагы ВИЧ-СПИД дартына чалдыккан балдар үчүн болгону эки миллион сом сураганбыз. Мынча каражат балдардын тамак-ашына эле сарпталмак. Тилекке каршы, жергиликтүү депутаттар бул берене боюнча каражаттарды спортту өнүктүрүүгө жумшашаарын айтышты. Бирок, моминтип алар ВИЧ-СПИД жөнүндөгү мыйзамды одоно түрдө бузуп жатышат, – деп тызылдады Саламаттыкты сактоо министрлигинин алдындагы Коомдук Кеңештин мүчөсү Айбар Султангазиев. – Ушул тапта Кыргызстанда жалпысынан 600 бала ВИЧ-СПИД илдетине чалдыккандыгы ашкереленген.Мунун 300 чактысы Түштүк жергесиндеги медициналык мекемелерден жуктурулган. Ошондуктан, буларга энесинин эмчегин эмизбестен, моралдык компенсация сыңары мамлекет өзү такай сүт азыктарын берип турууга түздөн-түз милдеткер!

ВИЧ-СПИД жөнүндөгү мыйзамга ылайык ВИЧ-СПИД дартына чалдыккан энелерден төрөлгөн балдарды бир жашка чейин республикалык жана жергиликтүү бюджет өзү сүт азыктары менен үзгүлтүксүз каржылоого милдеткер!

 Алишер ТОКСОНБАЕВ, өз кабарчы