1,159 Бардыгы /

ЕАЭБге кирбеген өлкөлөрдүн ичинен Тажикстан Орусиядагы мигранттар үчүн каралган жеңилдиктерди болушунча пайдаланып жатат. Бул тууралуу 5-февралда Орусиянын тышкы иштер министри Сергей Лавров Орус-тажик славян университетиндеги маалымат жыйынында билдирди.

Анын айтымында, тажик жарандары Орусияда каттоосуз 7 эмес, 15 күнгө чейин жүрө алышат. «Патент үч жылдык мөөнөткө берилет. Бул дагы жакшы жеңилдик. Албетте патенттер тез берилип, баасы арзаныраак болсо дейбиз, бирок мунун баарын сүйлөшүү аркылуу чечсе болот», — деди Лавров.

Орусияда чет өлкөлүк жарандардын ишмердүүлүгү үчүн патент киргизилгенден кийин өлкөнүн ар кайсыл аймагына ар башка тарифтер белгиленген. Алсак, Москвада патенттин бир айлык баасы 5 миң рубль, Москва облусунда 4750, Санкт-Петербургда 3800 рублди түзөт. Патенттин эң кымбаты Саха-Якутия республикасында. Анда анын баасы 9330 рублге чейин жетет.

Мындан тышкары орус ТИМ башчысы эмгек мигранттарынын укуктарын кепилдеген макулдашууларга кол коюунун маанилүүлүгүн белгиледи. «Биз эмгек мигранттарынын пенсиялары жана мигранттарды Орусиянын аймагына кире электе эле Тажикстандын аймагында тандап алууну уюштуруу тууралуу макулдашууга кол коюшубуз керек. Мындан тышкары Тажикстанды Орусиянын мыйзамдарын бузган жарандарын кайра кабыл алууга милдеттендирген реадмиссия тууралуу макулдашууга кол коюлушу зарыл. Биз ЕБ менен мындай келишимге кол койгонбуз, андан коркуунун кереги жок», — деп кошумчалады ал.

Лавров жогоруда белгиленген документтер топтому бул тармак толугу менен көмүскөдөн чыгып, мигранттар үчүн жакшы шарттардын түзүлүшү үчүн зарыл экенин белгиледи.

www.