963 Бардыгы /

 «Тажикпромбанктын» мурдагы башчысы Жамшед Зиёев банкка 100 миллион сомони (10 миллион доллардан ашык) каражатты мүлк менен кайтарып берди. Бул тууралуу өлкөнүн Улуттук банкынын төрагасы Жамшед Нурмухаммадзода Душанбедеги маалымат жыйынында билдирди.

Былтыр апрелдин аягында кармалган Жамшед Зиёев учурда Душанбедеги тергөө абагында камакта. Ага каршы «Алдамчылык» жана «Ишенип берилген акчаны коротуу» беренелери менен кылмыш иши козголгон. Учурда бул иш боюнча тергөө иштерин өлкөнүн Башкы прокуратурасы жүргүзүүдө.

«Жамшед Зиёев банкка 100 миллион сомони каражатты мүлк менен кайтарып берди. Эми аны «Тажикпромбанк» аукциондо сатып, түшкөн акчаны аманатчыларга кайтарып берет. Учурда банктын калкка болгон карызы 59 миллион сомониге азайды», — деди Улуттук банктын төрагасы.

Былтыр Эсеп палатасынын аудиторлору жоюлуунун алдында турган «Тажикпромбанкка» 270 миллион сомони өлчөмүндө каржылык зыян келтирилгенин аныктап чыккан.

Аталган банкка 45 миң доллар акчасын салган белгилүү адвокат Солижон Жураев былтыр өкмөткө ачык кат жазып, Зиёевди бухгалтердик эсептин көмүскө жолун колдонууга жана банктын каражатын чыгашалуу ишканаларга бөлүштүрүүгө айыптаган. Ал жетекчилик банктын калган активдерин жогорку баалар менен эсептеп, аманатчылардын акчаларын атайылап кайтарып бербей жатат деп эсептөөдө.

7-февралда «Тажикпромбанктын» убактылуу башчысы Такдир Шарипов аманатчыларга мүлктөр сунушталып жатканын, бирок алардын көбү акчалай алууну каалап жатышканын билдирди. Анын айтымында, акыркы жылдары «Тажикпромбанктын» аманатчыларынын саны 5800дөн 310го чейин азайган. «Банк жоюлуу алдында турат. Бул жараяндын качан аяктай турганын биз билбейбиз», — деди ал.

www.