1,028 Бардыгы /

Алматы полициясы бийликтеги «Нур Отан» партиясынын шаардагы кеңсесинин алдына чогулган адамдарды кармап кетти.

Маалыматтарга караганда, кармоолордун жаңы толкуну өлкө президенти Нурсултан Назарбаевдин отставкасын талап кылган кыйкырыктардан көп өтпөй башталган.

Ага чейин окуя болгон жерге барган прокуратура өкүлү адамдар «мыйзамсыз» жыйын уюштуруп жатканын айтып, алардын полиция бөлүмүнө баруусун талап кылган. Бул талапка баш ийбегендердин айрымдары кармалган.

Кармалгандардын арасында улуу жана жаш муундун өкүлдөрү бар. Азырынча полиция кармоолордун себептерин айта элек.

Астанада бүгүн «Нур Отан» партиясынын съезди өтүп жатат. Ага партиянын лидери, өлкө президенти Нурсултан Назарбаев дагы катышууда.

Мурдараак партиянын Алматыдагы кеңсесинин алдына чогулгандар өздөрүнүн жарандык позицияларын билдируү үчүн келишкенин айтышкан. Алардын колдорунда эч кандай плакаттар болгон эмес. Чогулгандардын айрымдары жаштар үчүн жумуш орундарын түзүү, көп балалуу энелерди социалдык жактан колдоону күчөтүү, реформаларды жасоо жана бийлик партиясындагы лидерди алмаштыруу талаптарын айтышкан.

Назарбаев Казакстанды 1991-жылдан бери башкарып келет. Укук коргоочулар менен бийликтин сынчылары 78 жаштагы Назарбаев саясий каршылаштарын четтеттүү үчүн бийлик рычагдарын пайдаланып жатканын айтып келишет.

www.