1,439 Бардыгы /

ДЕЛИ. Дели университетинин славян жана фин-угор факультетинде «Чыңгыз Айтматовду окуп жана майрамдап» аталышындагы илимий-практикалык конференция аяктады. Иш-чара Улуу жазуучунун 91 жылдыгына арналып, аны 1926-жылы түптөлгөн Дели университети демилгеледи жана уюштурду.

Илимий-практикалык конференцияга Кыргызстандын Индиядагы Элчиси Асеин Исаев жана Элчиликтин башка өкүлдөрү абдан активдүү катышышты. Анткени, бул иш-чаранын алкагында Кыргызстандын Индиядагы Элчилиги залкар калемгердин өмүрүндөгү эң урунтуу окуялар туурасында сүрөт көргөзмөсүн дагы уюштурду. Буга улай Дели университети залкар жазуучунун Индиянын хинди, бенгали, телугу, малави жана башка тилдерине которулган чыгармалырынын көргөзмөсүн тартуулады. Мындан тышкары Кыргызстандын Индиядагы Элчиси Асеин Исаев жана Дели университетинин, ошондой эле Индиянын башка ЖОЖдорунун таанымал илимпоздору көрүп-билгендерин тең бөлүшүштү. Айрыкча Кыргыз Элчиси Асеин Исаев азыркы заманбап адабияттын калыптанышында Чыңгыз Айтматовдун мээнети ат көтөргүс экендигин баса белгиледи. Анткени, анын бар бир чыгармасында адамзатты бүгүн катуу түйшөлдүргөн маселелер гана көтөрүлүп, аларды чечүүнүн жолдору даана айтылган. Профессорлор Ниилакшми Сурьянараян, Назар Руми, Ранжана Саксена, Ману Миттал жана башкалардын пикиринче, Чыңгыз Айтматовдун залкарлыгы анын чыгармалары цивилизация, элдер, тилдер жана маданият ортосундагы карым-катышты бириктерген көпүрөгө гана айланган. Андагы адамгерчилик, толеранттуулук жана философия Индиянын элинин дагы ушундай асыл сапаттары менен абдан тыгыз үндөшүп турат.

  Дели университетинде өткөрүлгөн  «Чыңгыз  Айтматовду окуп жана майрамдап» аталышындагы илимий-практикалык конференциянын соңунда Талант Жумабаев тарткан «Устаттын мурасы» аттуу даректүү фильм көрсөтүлүп, көрөрмандарды дагы олуттуу ойго салды.

Алишер ТОКСОНБАЕВ, өз кабарчы