2,609 Бардыгы /

Бүгүн 26-апрель Жалал-Абад мамлекеттик университетинде “Ачык эшиктер күнү” өттү.

Аталган иш-чарага жогорку окуу жайга тапшырууну каалаган жаштар, алардын ата-энелери жана мектептердин мугалимдери катышты.
Мындай иш-чара ар жылы мектеп бүтүрүүчүлөрүнө кесиптик багыт берүү максатында уюшулуп келет.

“Бүгүн биздин окуу жай Ачык эшиктер күнүн өткөрүп жатат. Иш-чарага Жалал-Абад шаарынан, Сузак, Базар-Коргон, Ноокен райондорунун мектеп бүтүрүүчүлөрү чакырылган. Аталган иш-чаранын негизги максаты келечектеги абитуриенттерге ЖАМУ тууралуу маалымат берүү. Алар келип, окуу жай тууралуу кеңири маалымат ала алышат. Кесип тандоо дайыма жаш улан-кыздар үчүн көйгөй болуп келет. Биз ошол кесип тандоо түйшүгүн жеңилдетүү максатын да көздөйбүз. Болочок кесибин туура тандоого аз болсо да багыт беребиз” –дейт Атабек Алибаев ЖАМУнун окуу иштери боюнча проректору.
Ачык эшиктер күнүнө келген окуучулар ЖАМУ чоң окуу жай экенин, келечекте ушул окуу жайга тапшырарын жана башкаларга да сунушташарын билдиришти.

“Биз Ноокен районунан келдик. Бизге ЖАМУ тууралуу кеңири маалымат беришти. Чындыгында бул окуу жайды мындай элестеткен эмесмин. Мен дагы буйруса ЖАМУга келип окуйм деген жакшы ниетте турам. Ошондой эле жалпы мектеп бүтүрүүчүлөрүнө да ушул окуу жайды сунуштамакмын” –дейт Элиза Асылбекова, окуучу.

Ошондой эле акциянын катышуучуларына ЖАМУнун “Маданий эстетикалык” борборунун чыгармачыл жамааты концерттик программа тартуулады.

Белгилей кетсек, ЖАМУда жогорку билимдүү адистерди даярдоо үчүн жетишерлик материалдык-техникалык базалар бар, алсак: 16 окуу корпусу, 105 окуу кабинети, 32 компьютердик класс, 122 лаборатория, 500 орундуу окуу залы, 726636дан ашуун китеп фонду, 1400 орундуу 4 жатакана о.э., 6 факультет, 7 колледж, 2 институт, 20дан ашуун кесиптик багыттагы адистерди даярдайт. Учурда аталган окуу жайда 12 000дөн ашуун студент билим алат.

Бүбүсара ОРОЗАЛИЕВА, “Аймак”