1,290 Бардыгы /

Өзбекстанда «Юксалиш» деп аталган жалпы улуттук кыймыл өзбек тилин өнүктүрүү жана өлкө калкынын тил жактан сабаттуулугун жогорулатуу боюнча бир нече сунуш иштеп чыкты.

Кыймылдын өкүлдөрү белгилешкендей, алар бул темага өлкөдө орус тилине расмий тил макамын берүү боюнча талкуу башталгандан кийин кайрылышкан. Майдын башында Орусиянын тышкы иштер министри Сергей Лавровдун Ташкентке сапары алдында өзбек интеллигенция өкүлдөрү орус тилине расмий тил макамын берүүнү демилгелеп чыгышкан.

«Юксалиш» кыймылынын мүчөлөрү бул сунуштарды иштеп чыгууда аларда адамдарды өзбек тилин гана үйрөнүүгө мажбурлоо ниети жок экенин белгилешти.

«Социалдык түйүндөр менен медиачөйрөдөгү билдирүүлөргө, ошондой эле өлкө жарандарынын пикирлерине жасалган анализдер калктын, өзгөчө жаштардын мамлекеттик тилде сабаттуу сүйлөөсүн, сүйлөө маданиятын, тил нормаларын билүү деңгээлин жогорулатуу маселеси курч турарын көрсөттү. Мамлекеттик тилди улуттук биримдикти бекемдөөчү маанилүү фактор катары өнүктүрүп, ошол эле маалда Өзбекстанда жашаган башка улуттардын укуктарын бузбоо жана алардын салт-санаасы менен маданиятын сыйлоо маанилүү», — деп жазылган кыймылдын билдирүүсүндө.

«Юксалиштин» мүчөлөрү Өзбек тилин өнүктүрүү концепциясын иштеп чыгуу, калктын тил нормаларын билүү деңгээлин жогорулатуу, ошондой эле тилди өнүктүрүү боюнча жакынкы беш жылга деталдуу «жол картасын» бекитүү зарыл деп эсептешет.

Кыймылдын билдирүүсүндө ошондой эле өзбек тилин өнүктүрүү боюнча бирдиктүү мамлекеттик саясатты ишке ашырууга жооптуу боло турган атайын мамлекеттик орган түзүү сунушу жазылган. Кыймылдын мүчөлөрү мамлекеттик тилди пропагандалоонун бир жолу катары жыл сайын өзбек тили боюнча жалпы улуттук жат жазуу уюштуруу керек экенин белгилешти. Ошондой эле алар өлкөдөгү билим берүү мекемелери менен буга кызыкдар түзүмдөрдө каалоочулар үчүн өзбек тилин окутуу боюнча бекер курстарды уюштурууну сунушташты.

www.