1,268 Бардыгы /

 БИШКЕК. Касымбек Мамбетов 2010-жылдагы айтылуу июнь коогалаңында саламаттык сактоо министринин орун басары эле.

– Ошол күндөрү мен жаңы бекитилген министрдин орун басары катары түнкү саат 1:00дөрдө Өкмөт үйүнөн тапшырма алдым. Жалал-Абад облусунда чыккан чырга байланыштуу эртең менен жолго  чыгышым керек болду. Таңкы саат 6:00дө генерал Исмаил Исаков жетектеген атайын топ окуя болгон жерге  учуп бардык. Тик учакта баратып эле акыбал абдан оор экендигин байкадым.  Күч түзүмдөрүнүн өкүлдөрү чогулуп, өзүнчө жыйын курушту. Мен дароо саламаттык сактоо тармагын колго алдым. Жыйынтыгында июнь коогалаңы басылып, жашоо бир нукка түшкөнчө, биз ошол жакта күнү-түнү иштедик. Жаракат алгандарды, а түгүл жөнөкөй бейтаптарды дагы үйлөрүнө дейре барып дарылап жаттык. Түнбү, күнбү, бир дагы медицина кызматкери баш тартпай, барчу жерге жалгыздап болсо дагы барып, ооруп жаткан адамдарга убагында медициналык көмөк көрсөтүп жаттык. Ошондой эле аскер кызматкерлери дагы биздин коопсуздугубузду, жалпы шаардын тынчтыгын үзгүлтүксүз камсыздап турушту. Тилекке каршы, бул коогалаңда жүздөгөн адамдар каза тапса, мунун жыйырма чактысы дагыле дайынсыз. Анан дагы жыйырма сөөктүн кимдиги ушул күнгө чейин белгисиз, — деп кошумчалады саламаттык сактоо министринин мурдагы орун басары Касымбек Мамбетов.

Касымбек Мамбетовдун эсебинде, 2010-жылдагы июнь коогалаңында каза тапкандардын жалпы саны 452 адамга жеткен. А расмий маалыматтарга караганда, жыйырма адам дайынсыз жоголсо, дагы жыйырма кишинин сөөгүнүн али күнгө чейин кимдиги тактала элек. Кошумчалай кетчү жагдай: 2010-жылы июнь айында алгач Жалал-Абад шаарында, андан соң Ош шаарында улуттар аралык кагылыш – араздашуу курч мүнөздө жүргөн.

                        Алишер ТОКСОНБАЕВ, өз кабарчы