696 Бардыгы /

БИШКЕК. Кыргыз Республикасынын Президенти Сооронбай Жээнбеков Евразия турукташтыруу жана өнүктүрүү Фондунун долбоордук блогунун аткаруучу директору Андрей Широковду кабыл алды. Анда биргелешкен социалдык-экономикалык долбоорлорду жүзөгө ашыруунун жүрүшү жана өнүгүүгө багытталган кызматташтыктын келечеги кең-кесири талкууланды.

Президент Сооронбай Жээнбеков Токтогул ГЭСин реаблитациялоо жана энергетикалык, инвестициялык долбоорлор боюнча Кошумча Макулдашууну жүзөгө ашыруу республикада энергетикалык кубаттуулуктун көлөмүн арттырууга мүмкүнчүлүк берээрине ишене тургандыгын ачыктады. Ошондой эле ЕврАзия турукташтыруу жана өнүктүрүү Фонду тарабынан «Ден соолук кербени» долбооруна бөлүнгөн грант айыл калкын алдын ала медициналык кароодон өткөрүүгө олуттуу колдоо болоруна үмүттөнөөрүн дагы жашырган жок.

Ал эми Евразия турукташтыруу жана өнүктүрүү Фондунун долбоордук блогунун аткаруучу директору Андрей Широков Фонддун ишмердүүлүгүнө колдоосу үчүн терең ыраазычылыгын билдирди. Ал ирригациялык тармактагы жана республиканын аймактарын ичилүүчү таза суу менен камсыз кылуу долбоорлорун ишке ашыруу боюнча иштер башталгандыгын маалымдады. Соңку тапта калктуу пункттардын тизмеси аныкталды жана пилоттук долбоорлордун тажырыйбасы иликтенүүдө. Ал ошондой эле энергетика, транспорт, саламаттык сактоо жана айыл чарба чөйрөлөрүндөгү ири долбоорлорду ишке ашыруу мындан ары улантыла тургандыгын дагы белгиледи. Жогорудагы бардык багыттар боюнча тийиштүү мамлекеттик органдар менен тыгыз иш жүрүп жаткан чагы.

Ошондой эле тараптар Кыргызстандын аймактарындагы жолдорду куруу жана модернизациялоо боюнча инфратүзүмдүк долбоорлорду ишке ашыруу тууралуу дагы пикир алмашышты. Андан соң мындан аркы жемиштүү кызматташууга кызыкдарлыгын жана даяр экендиктерин ачык билдиришти.

Алишер ТОКСОНБАЕВ, өз кабарчы