637 Бардыгы /

БИШКЕК. «Энергиянын кайра жаралуучу булактары чөйрөсүндөгү мыйзамга өзгөртүүлөрдү киргизүү инвестициялык ишмердик үчүн жагымдуу шарттарды түзүүнү гана көздөйт. Анткени, инвесторлор үчүн айырмачылыгын толуктап берүү коэфициенттери кайрадан каралып чыкты», — деп баса белгиледи Кыргыз Президентинин Аппаратынын стратегиялык өнүктүрүү, экономика жана каржы саясаты бөлүмүнүн башчысы Данияр Иманалиев Кыргыз Республикасынын Президенти Сооронбай Жээнбеков кол койгон «Энергиянын кайра жаралуучу булактары чөйрөсүндөгү айрым мыйзам актыларына өзгөртүүлөрдү киргизүү жөнүндө» Кыргыз Республикасынын Мыйзамына комментарий берип жатып.

Бул мыйзамдын максаты энергетика тармагында экономикалык жана уюштуруучулук укуктук мамилелерди мындан ары өнүктүрүү, кайра жаралуучу энергетика чөйрөсүнө түз инвестицияларды тартуу, бул тармакты мамлекеттик жөнгө салуунун натыйжалуулугун жогорулатуу гана болуп саналат. Данияр Иманалиев белгилегендей, энергетика Кыргыз Республикасын 2040-жылга чейин өнүктүрүү стратегиясында артыкчылыктуу тармактарынын бири болуп саналат.

– Кичи энергетиканы өнүктүрүү өлкөбүз үчүн чоң артыкчылыктуу багыт болуп саналат. Анткени, бизде жыл сайын электр энергиясын колдонуу улам көбөйүп баратат. Биз энергетикадагы өзүбүздүн дараметибизди толук кандуу колдонбойбуз. Буга байланыштуу электр энергиянын альтернативдүү булактарын өнүктүрүү өлкөбүздүн жалпы өнүгүүсү үчүн абдан чоң артыкчылык болуп эсептелет, — деп кошумчалады Кыргыз Президентинин Аппаратынын стратегиялык өнүктүрүү, экономика жана каржы саясаты бөлүмүнүн башчысы Данияр Иманалиев.

Данияр Иманалиев киргизилген өзгөртүүлөр жеке сектор, ишкерлер жана инвесторлор тарабынан оң гана кабыл алынаарына терең ишенгендигин билдирди.

Ал эми Чакан ГЭСтер Биримдигинин төрайымы Эльвира Боромбаева баса белгилегендей, аталган мыйзамдын үстүндө дээрлик үч жылга жакын иш жүрүгүзүлдү. 

-Экономиканы өнүктүрүү үчүн чакан суу энергетикасы абдан маанилүү. Биз суу ресурстарынын көлөмү боюнча дүйнөдө үчүнчү орунда турабыз. Аймактарды өнүктүрүү жана өлкөнү санариптештирүү жылынын алкагында биринчи кезекте биздин экспорттук дамаметибизди өнүктүрүүбүз абзел! Бул — кошумча өнөй жай обьектилери, жумуш орундары, элдин бакубатчылыгын жогорулатуу. үзгүлтүксүз энергия кубаттуулугун ташып жеткирүү дегеле мүмкүн! — деди Чакан ГЭСтер Биримдигинин төрайымы Эльвира Боромбаева.

Эльвира Боромбаева кошумчалагандай, өлкөбүздөгү электр энергиясынын тартыштыгын эске алуу менен Чакан ГЭСтерди өнүктүрүү  маселени эң ыкчам чечүү жолу гана болуп саналат. Ал баса белгилегендей, мыйзамды кабыл алуу менен энергиянын кайра жаралуучу булактары чөйрөсүндөгү ишмердүүлүктүн  эрежелеринин алкагы эми гана аныкталды.

-Акыркы жылдары жергиликтүү жана чет өлкөлүк инвесторлордун биздин рынокко чоң кызыгуусу пайда болду. Бирок, так “Оюн эрежесинин” жоктугунан улам алар кайтып кетип жатышкан. Азыр биз Өкмөт менен бирге айрым учурларын кайра иштеп чыгып, бардык тийиштүү нормативдик-укуктук актыларды азыркы мыйзамга шайкеш келтирүүбүз абзел! Биздин өлкөдө өлкөдө аталган мыйзам мамлекеттик жеке-өнөктөштүктүн мыкты үлгүсү болуп калды деп ойлойм, — деп баса белгиледи Чакан ГЭСтер Биримдигинин төрайымы Эльвира Боромбаева.

Айтмакчы, «Энергиянын кайра жаралуучу булактары чөйрөсүндөгү айрым мыйзам актыларына өзгөртүүлөрдү киргизүү жөнүндө» Кыргыз Республикасынын Мыйзамы Жогорку Кеңеш тарабынан үстүбүздөгү жылдын 27-июнунда кабыл алынган эле.

Алишер ТОКСОНБАЕВ, өз кабарчы