725 Бардыгы /

Алматыда үч адамды автоунаа менен сүздүрүп кетүүгө шектелгендердин бирөөсү кармалды. Бул тууралуу шаардык полиция департаменти билдирди.

Мекеменин өкүлү Думан Аухадиевдин айтымында, шектүү катары Алматы облусунун 24 жаштагы тургуну колго түштү. Окуя болгон маалда ал ак түстөгү Toyota Camry автоунаасын айдап жүргөн. «Toyota Avensis үлгүсүндөгү экинчи унаанын айдоочусунун дагы тек-жайы аныкталды, ал да сөзсүз кармалат», — деп кошумчалады Аухадиев.

Учурда тиешелүү экспертизалар дайындалып, «Адам өмүрүнө кол салуу» беренеси боюнча тергөө иштери башталды.

Окуя 26-августта болгон. Болжол менен таңкы саат бештерде шаардын Бостандык районунда айдоочу үч адамды сүзүп, качып кеткен. Бул учур тартылган видео интернетке жарыяланган. Анда алгач ак түстөгү Toyota Camry унаасы жолдо турган адамдардын жанына келип токтогонун, андан соң экинчи машине аларды сүзүп, окуя болгон жерден качып кеткенин көрүүгө болот.

Полиция алгач бул окуя боюнча «Жол эрежесин бузуу», «Жол кырсыгы болгон жерден качып кетүү» жана «Бейбаштык» беренелеринин негизинде тергөө иштери башталганын билдирген.

www.