3,473 Бардыгы /

Жаш өспүрүмдөрдөн түзүлгөн “Жол кыймылынын жаш инспектору” командасы Казакстанда өткөн 19-слетунда үчүнчү орунду ээлешти.

Казакстандын Караганда шаарында болуп өткөн “Жол кыймылынын жаш инспектолору” республикалык 19-слетунда Кыргызстандын атынан барган Сузак районунун З.Бакиров мектебинин жаш өспүрүмдөрү 3-орунга ээ болушту. Анын ичинен ар түрдүү номинацияларды да багындырышкан. Бул тууралуу  Жалал-Абад областтык ЖКККБ штабынын инспектору Айбек Сатыбалдиев төмөнкүдөй кошумчалады.

“Бизде бул конкурс жыл сайын өтүп турат. Райондук, областтык турдан өткөн республикалык турга аттанат. Биз бул командага ишенгенбиз. Конкурска катышкан 10 өспүрүмдүн баары зирек балдар. Казакстандан келген чакыруунун негизинде ушул курам катышып, 20 команданын ичинен 3-орунга ээ болуп кайтышты. Бул албетте жакшы көрсөткүч” – дейт А.Сатыбалдиев.

Аталган команданын капитаны Барсбек Белеков конкурста жакшы жетишкендиктерге ээ болуп, өзүнө көп тажрыйба алганын айтты. Бул конкурстар келечектеги кесибин тандап бергенине шарт түзгөнүн баса белгиледи.

“Бул конкурска март айынан тартып даярдана баштадык. Райондук, областтык турда 1-орунду алганбыз. З.Бакиров мектебинде окуп жүрүп, ушул командага командир керектелгендиктен мени сунушташкан. Бул конкурстарга катышып жүрүп, өзүмө көп тажрыйба алдым. Эң негизгиси жолдо кантип жүрүүнү, автоунааны башкаруу эрежелерин, өзүмдүн жана башкалардын коопсуздугун башкарууну үйрөндүм. Караганда шаарында болуп өткөн конкурста “Эң мыкты командир” номинациясына ээ болдум. Келечекте мен дагы жол коопсуздугун көзөмөлдөөчүсү болгум келет” – дейт 8-класстын окуучусу Б.Белеков.

Кошумчалай кетсек, жаңы окуу жылынын башталышында Жалал-Абад областтык ЖКККБнын кызматкерлери менен биргеликте аталган команда жолго жакын жайгашкан мектептердин жанында жол кырсыктарын алдын алуу боюнча иш алып барышты.

Бүбүсара ОРОЗАЛИЕВА, “Аймак”