637 Бардыгы /

БИШКЕК. Президенти Сооронбай Жээнбеков Азия футбол конфедерациясынын (АФК) президенти Салман бин Ибрагим Аль Халиф менен жолугушту. Анын жүрүшүндө футболду өнүктүрүү жана аны өлкөдө мындан ары дагы кеңири жайылтуу боюнча пикир алмашуу жүрдү.

Президент Сооронбай Жээнбеков Азия аймагында футболду өнүктүрүүгө багытталган АФКнын ишмердигин жана реформаларын чоң канааттануу менен белгиледи. Мамлекет башчысы Кыргызстанда футбол спорттун эң белгилүү массалык түрү болуп саналаарын, бардык шаарларда жана айылдарда жаштар футбол гана ойношоорун баса белгиледи. Андан ары аймактарды өнүктүрүү боюнча мамлекеттик саясаттын алкагында облустарда, шаарларда жана район борборлорунда спорт залдар жана жаңы спорт аянтчалары курулуп жаткандыгын белгиледи. Ошол эле учурда Бишкек шаарында футболдук  жана спорттук инфратүзүм эскиргендигин кошумчалап, борбор калаада футболду кесипкөй деңгээлге чыгаруу максатында жаңы стадион куруу боюнча пландар тууралуу айтып берди.

АФК Президенти Салман бин Ибрагим Аль Халиф  футболду колдоосу жана жемиштүү кызматташуусу үчүн Кыргыз жетекчилигине ыраазылык билдирди. Ал Кыргызстандын футбол Федерациясы менен биргелешкен иштер жүргүзүлүп жаткандыгын баса белгилеп, өз ара кызматташуунун болочок пландары тууралуу айтып берди. Салман бин Ибрагим Аль Халиф дагы ата мекендик футболду мындан ары өнүктүрүү демилгелерине жана Кыргызстандагы футболду оожалтууга багытталган долбоорлорду ишке ашыруу үчүн көмөк көрсөтүүгө даяр экендигин дагы ачыктады.

Алишер ТОКСОНБАЕВ, өз кабарчы