894 Бардыгы /

БИШКЕК. Кыргыз Президенти Сооронбай Жээнбеков Кувейт Мамлекетинин каржы министри Наиф Фалах Мубарак Аль-Хаджраф менен жолугушту. Анда өлкөлөр ортосундагы каржылык жана инвестициялык кызматташтыктын келечеги кең-кесири талкууланды.

Мамлекет башчысы Кувейт менен эки тараптуу алаканы мындан ары кеңейтүү Кыргызстандын тышкы саясатындагы артыкчылыктуу багыттардын бири экендигин өзгөчө белгиледи. Сооронбай Жээнбеков Кувейт тарапка экономикалык жана каржылык көмөгү үчүн терең ыраазычылыгын дагы  билдирди. Атап айтканда, стратегиялык инфратүзүм долбоорлорду ишке ашырууда Араб экономикалык өнүктүрүү Кувейт Фондунун ишмердигин өзгөчө белгиледи. Ошондой эле Мамлекет башчысы «Ас-Салам», «Ас-Сафа» жана «Ассанабил» кайрымдуулук фонддорунун жакшы ишмердигине дагы канааттануу менен токтолду.

Андан ары Президент Сооронбай Жээнбеков өлкөлөр аралык соода-экономикалык жана маданий-гуманитардык кызматташуунун өстүрүү зарылдыгын баса белгилеп, аймактарды өнүктүрүү, санариптештирүү, айыл чарба, билим берүү, медицина жана башка тармактарда биргелешкен долбоорлорду ишке ашырууга даяр экендигин билдирди.

Кувейттин каржы министри Наиф Фалах Мубарак Аль-Хаджраф Кувейт тарап бардык багыттар боюнча эки тараптуу кызматташтыкты тереңдетүүгө кызыкдар экендигин жашырган жок. Ал ошондой эле инвестициялык сунуштарды дагы карап чыгып, биргелешип иштетүүгө даярдыгын билдирди.

Алишер ТОКСОНБАЕВ, өз кабарчы