871 Бардыгы /

БИШКЕК.  Кыргыз Републикасынын Президенти Сооронбай Жээнбеков аялдар күрөшү боюнча Дүйнө чемпиону АйсулууТыныбекова, анын машыктыруучусу Нурбек Изабеков, ата-энеси Болот Тыныбеков жана ГүлпарТыныбекова менен жолугушту.

Мамлекет башчысы адегенде Айсулуу Тыныбекованы Казакстандын Нур-Султан шаарында өткөн Дүйнө чемпионатында аялдар күрөшү боюнча 1-орунду ээлеп, Кыргызстандын эгемендик жылдарында эң алгачкы Дүйнө чемпиону болушу менен куттуктады: – Сенин алтын медалың —булл Кыргыз спортунун, Кыргызстандын чоң ийгилиги, баарыбыз абдан кубандык. Буга чейин Азия чемпионаттарында, Азия оюндарында жеңишке жетип, эми Дүйнө чемпионатында алтын медалга ээ болдуң.Бул сенин жана машыктыруучуларыңдын көп жылдык талыкпаган эмгегинин гана үзүрү! Жеңишке жетүү абдан оор болгондугун билебиз. Келерки Олимпиада оюндарында дагы ийгиликке жетишериңе бекем ишенем!

Президент ошондой эле көп жылдан бери аялдар күрөшү боюнча Кыргыз Республикасынын улуттук курама командасынын башкы машыктыруучусу болуп эмгектенип келген Нурбек Изабековго жана Айсулуу Тыныбекованын ата-энесине дагы ыраазычылыгын билдирди. Ал эми Айсулуу Тыныбекова Президентке, жалпы Кыргыз элине колдоосу үчүн рахматын айтып, булл жеңишин өз өлкөсүнө, кыргызстандыктарга арнагандыгын жар салды.  А Нурбек Изабеков бул мелдеште Борбор Азия мамлекеттеринин ичинен жалгыз Айсулуу Тыныбекова алтын медаль тагынгандыгын эске салды. Кыргызстан үчүн алгачкы болгон булл жеңишке жетишүү жакшы жөрөлгө экендигин баса белгилеп, көрсөтүп жаткан колдоосу үчүн Мамлекет башчысына чоң ыраазычылыгын билдирди.

Жолугушуунун соңунда Президент Сооронбай Жээнбеков аялдар күрөшү боюнча Дүйнө чемпиону Айсулуу Тыныбековага Бишкек шаарынан үч бөлмөлүү батирдин сертификатын, машыктыруучусу Нурбек Изабековго акчалай сыйлык, ал эми ата-энеси Болот Тыныбеков жана ГүлпарТыныбековага Кыргыз Президентинин энчилүү сааттарын тапшырды.

Алишер ТОКСОНБАЕВ, өз кабарчы